تۇركىستاندا ءال- فارابي تۋرالى انيماتسيالىق فيلمنىڭ تانىستىرىلىمى ءوتتى
فيلمدى تۇركىستان وبلىسى اكىمدىگىنىڭ تاپسىرىسىمەن «وڭتۇستىكفيلم» ك م م - ءسى مەن «ساق» كينوستۋدياسى تۇسىرگەن، دەپ حابارلايدى وڭتۇستىك قازاقستان وبلىسى اكىمىنىڭ باسپا ءسوز قىزمەتى.
بۇل فيلمدە الەمگە ايگىلى عۇلاما ءال- فارابيدىڭ بالالىق شاعى، بىلىمگە دەگەن العاشقى قادامى، جاڭاشىلدىققا دەگەن ۇمتىلىسى سيپاتتالادى. ءبىلىمىن ەل يگىلىگىنە جۇمساعان عۇلامانىڭ ءوز ەلىنە دەگەن سۇيىسپەنشىلىگى، وتانعا قىزمەت ەتۋدەگى قايراتكەرلىگى سۋرەتتەلگەن.
تاريحي دەرەكتەرگە سۇيەنسەك، ءال- فارابي قازىرگى وتىرار اۋدانى اۋماعىنداعى وقسىز قالاشىعىندا دۇنيەگە كەلگەن. سوندىقتان فيلمنىڭ اتى دا «وقسىز وقيعاسى» دەپ قويلىعان. 3D فورماتتا ازىرلەنگەن فيلمنىڭ ۇزاقتىعى - 25 مينۋت. رەجيسسەرى - نۋريددين پاتتەيەۆ، سەناريىن جازعان باقىتجان قۇلجاباي، كومپوزيتورى ايتەكە كوپتىلەۋ، قويۋشى سۋرەتشىسى سامات نۇراليەۆ.
انيماتسيالىق فيلمدى تۇسىرۋدەگى ماقسات - جاس ۇرپاقتى وتانسۇيگىشتىككە باۋلىپ، ادال ءارى ءبىلىمدى بولۋعا شاقىرۋ. ۇلى تۇلعالارعا، تاريحقا دەگەن قۇرمەتتى وياتۋ.
تۇركىستان وبلىسى اكىمدىگى ۇيىمداستىرعان جيىندا «رۋحاني جاڭعىرۋ» جوبالىق كەڭسەسىنىڭ جەتەكشىسى باقىتجان اشىربەكوۆ اتقارىلعان جۇمىستار جونىندە باياندادى.
ونىڭ ايتۋىنشا، تۇركىستان وبلىسى «رۋحاني جاڭعىرۋ» باعدارلاماسى اياسىندا ۇلت رۋحانياتىنا وڭ سەرپىن بەرەتىن ءىس- شارالار بويىنشا كوشباسشىلار قاتارىندا. سونىمەن بىرگە ەلباسىنىڭ «ۇلى دالانىڭ جەتى قىرى» باعدارلامالىق ماقالاسىنداعى مىندەتتەردى ورىنداۋ باعىتىندا دا جۇمىستار قولعا الىنعان.
«رۋحاني جاڭعىرۋ» باعدارلاماسىنىڭ 2 جىلدىعىنا ارنالىپ وتكىزىلگەن باسقوسۋدا تۇركىستان وبلىستىق مادەنيەت جانە تىلدەردى دامىتۋ باسقارماسىنىڭ ءبولىم باسشىسى عاليا شارافيەۆا جاستارعا، جالپى ازاماتتارعا پاتريوتتىق تاربيە بەرەتىن جوبالارعا ءاردايىم قولداۋ كورسەتىلەتىنىن جەتكىزدى. فيلم رەجيسسەرى نۋريددين پاتتەيەۆ تە وسى باعىتتاعى فيلمدەردى ءتۇسىرۋ جۇمىستارى جالعاساتىنىن ايتتى.
ايتا كەتەيىك، «ساق» كينوستۋدياسى وتكەن جىلى وبلىس اكىمدىگىنىڭ تىكەلەي قولداۋىمەن «كۇش اتاسى - قاجىمۇقان» ، «وتىراردى قورعاۋ» ، «كيەلى قازىعۇرت» انيماتسيالىق فيلمدەرىن جانە «كونە جەتىگەننىڭ سىرى» اتتى 10 سەريالى تەلەحيكايا مەن «ۇلى جىبەك جولى بويىنداعى كونە قالالار» دەرەكتى فيلمىن، «ورداباسى - بىرلىكتىڭ تۋى» فيلمدەرىن جۇرتشىلىققا ۇسىندى.
جاقىندا «تۇركىستان» انيماتسيالىق فيلمى مەن «تولە بي» اتتى 10 سەريالى كينوحيكايا دا كورەرمەنگە جول تارتادى.
