قازاقستاننىڭ قازىرگى تاريحى جايلى فيلم ءتۇسىرۋ كەرەك - اقان ساتايەۆ
«بۇگىن «رۋحاني جاڭعىرۋ» باعدارلاماسى اياسىندا ءبىرشاما جوسپارلار تالقىلاندى. الدا اۋقىمدى جۇمىستار كۇتىپ تۇر. سول سەبەپتى، ناتيجەنى ءدال ەرتەڭ كۇتۋدىڭ قاجەتى جوق. سەبەبى، بۇل جوبالاردىڭ ءبارى دە بولاشاققا ارنالعان. ونىڭ ناتيجەسى ەلىمىزدەگى ءاربىر ازاماتىنا بايلانىستى بولادى» ، - دەدى رەجيسسەر «رۋحاني جاڭعىرۋ» باعدارلاماسىن جۇزەگە اسىرۋ بويىنشا ۇلتتىق كوميسسيانىڭ وتىرىسىندا.
ونىڭ ايتۋىنا قاراعاندا، مەملەكەت پەن ازاماتتار ءبىر- بىرىمەن ۇزەڭگىلەسە وتىرىپ، العا قاراي قادام باسۋى كەرەك.
«بارىمىزدى باعالاي ءبىلۋىمىز كەرەك. الەمدە ءبارى دە العا قاراي جىلجىپ بارا جاتقان ۋاقىتتا ارتقا قارايلاي بەرگەنىمىز جارامايدى. ءاربىر ازامات ءوز مەملەكەتىنەن بىردەڭەنى كۇتىپ وتىرماي، ءوز ەلىنە نە بەرەمىن دەگەن ويدى دا ۇمىتپاۋى ءتيىس» ، - دەيدى رەجيسسەر.
اقان ساتايەۆتىڭ ايتۋىنشا، الەمدەگى وزگە ەلدەردەگىدەي قازاقستاندا دا كينەماتوگراف سالاسىنىڭ ماڭىزى وتە زور.
«وتىرىس بارىسىندا قازىرگى ۋاقىتتا ادامداردىڭ وكىنىشكە قاراي، از وقىپ، كوبىنە تىڭداۋدى جانە تاماشالاۋدى قولاي كورەتىنى ايتىلىپ قالدى. مىنە، سوندىقتان مادەنيەتتە كينەماتوگراف سالاسىنا باسا كوڭىل بولىنەدى. وسىناۋ جۇمىستى جان- جاقتى جۇرگىزۋ كەرەك دەپ ەسەپتەيمىن» ، - دەيدى ول.
رەجيسسەر ءوز سوزىندە قازىرگى تاڭدا «تۇمار» فيلمى بويىنشا جۇمىس جۇرگىزىلىپ جاتقانىن تىلگە تيەك ەتتى.
«تۋىندى مونتاجداۋ ساتىسىنا تاياپ قالدى. «تۇماردان» بولەك، مەنىڭ ارىپتەستەرىم ءبىرشاما تاريحي فيلمدەردى ءتۇسىرىپ جاتىر. ءبىراق، الداعى ۋاقىتتا باسىمدىق تاريحي وقيعالارعا بەرىلىپ قانا قويماي، قازىرگى تاريحىمىز تۋرالى تۋىندى تۇسىرۋگە ۇمتىلۋىمىز كەرەك. وسىلايشا دۇرىس باسىمدىقتار مەن مادەني قۇندىلىقتاردى ناسيحاتتايمىز» ، - دەيدى رەجيسسەر.
ەسكە سالا كەتسەك، بۇگىن اقوردادا قازاقستان رەسپۋبليكاسى پرەزيدەنتىنىڭ جانىنداعى «رۋحاني جاڭعىرۋ» باعدارلاماسىن ىسكە اسىرۋ جونىندەگى ۇلتتىق كوميسسيا وتىرىسى ءوتتى.
