ىشكىندىك، ايداندى، قارىمجى: اسىعىس اۋدارىلعان تەرميندەردىڭ ماعىناسىن بىلەسىز بە
«تەرمين ماسەلەسىندە سان قۋماۋ كەرەك. مىسالى، مىنا تەرميندەردى سان قۋعاندىقتان بەكىتتىك. مىنانى قاراڭىزدار، «ىشكىندىك» - «گيپوسەنتر»، «مايتۇراقتىلىق» - «ماسلوستويكوست»، «ءتۇتىنتارتقى» - «دىموسوس»، «ايداندى» - «دەستيليانت»، «قارىمجى» - «زاداتوك»، ال «ساۋلەقۇراۋ» - «فوتوسينتەز»، - دەدى ش. قۇرمانباي ۇلى ق ر پارلامەنت ماجىلىسىندە وتكەن عىلىمي- پراكتيكالىق كونفەرەنسيادا.
عالىمنىڭ ايتۋىنشا، تەرمين اۋدارۋ - بۇل شىعارماشىلىق جۇمىس. ال شىعارماشىلىقتا اسىعىستىق بولماۋى كەرەك.
«قازىر ينديكاتور بار. وعان سايكەس، وتكەن جىلى 21 مىڭ تەرمين بەكىتىلدى. بيىل تاعى 24 مىڭ تەرمين، ال كەلەسى جىلى 27 مىڭ تەرمين بەكىتىلۋى كەرەك. ءبىراق بۇل - شىعارماشىلىق پروتسەسس. ماسەلەن، اقىنعا ءبىر ايدا 500 جول ولەڭ، ءبىر جىلدا 6 مىڭ ولەڭ جازۋ كەرەك دەپ تاپسىرما بەرە المايمىز عوي. اقىنعا جاپىراقتىڭ سىبدىرى، سۋدىڭ سىلدىرى اسەر ەتكەن كەزدە ولەڭ جازىلادى. ال اكىمشىلىك جولمەن ولەڭ جازدىرتساق، ول ولەڭ بولمايدى. سوندىقتان تەرميندى شىعارماشىلىقپەن جاساۋ قاجەت»، - دەپ اتاپ كورسەتتى ش. قۇرمانباي ۇلى.
ايتا كەتەيىك، بۇگىنگى جيىندا پروفەسسور شەرۋباي قۇرمانباي ۇلى تەرمينولوگيانىڭ وزەكتى ماسەلەلەرىن اتاپ ءوتتى. وسى ورايدا عالىم تەرمينكومنىڭ قۇزىرەتىن كۇشەيتۋ كەرەك دەپ سانايدى.
بۇدان بولەك، تەرميندەردى تاڭداعاندا باسشىلىقتىڭ بەدەلى باسىم بولىپ كەتەدى. ال احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى، پروفەسسور ەردەن قاجىبەك تەرمينولوگيا سوزدىكتەرىن شىعارۋ جوسپارلارى تۋرالى ايتتى.
