جىبەك جولى ەلدەرىنىڭ «ءدىن جانە وركەنيەت» جوباسىن قولعا الۋى ماڭىزدى - سەرىكباي قاجى وراز
بۇل تۋرالى بۇگىن ەلوردادا ءوتىپ جاتقان «رۋحاني جىبەك جولى. يسلام جانە جاستار: قازىرگى زامانعى سىن-قاتەرلەر» تاقىرىبىنداعى IV حالىقارالىق ءدىني-عىلىمي كونفەرەنسيا بارىسىندا قازاقستان مۇسىلماندارى ءدىني باسقارماسىنىڭ ءتوراعاسى سەرىكباي قاجى وراز ايتتى، دەپ حابارلايدى قازاقپارات ءتىلشىسى.
«تاريحىنان تاعلىم العان، ال تاريحي تۇلعالاردان ءتالىم كورگەن ۇرپاق ءدىنى مەن ءداستۇرىن ۇيلەستىرىپ، ونەگەلى ءومىر ساباقتاستىعىن قالىپتاستىرماق. بۇل باستاما تاريشى عالىمدار مەن ءدىن عۇلامالارىنىڭ جىبەك جولى تاريحىن عيبراتتىڭ كوزىمەن قايتا زەرتتەۋىن قاجەت ەتەدى. بۇل جۇمىستى جۇيەلى جۇزەگە اسىرۋ ءۇشىن جىبەك جولى ەلدەرىنىڭ ءدىني باسقارمالارى اراسىندا «ءدىن جانە وركەنيەت» جوباسىن قولعا الۋدىڭ ماڭىزى ۇلكەن. اتالعان جوبالار مەن ۇسىنىستاردى تالقىلاۋ ءۇشىن ارنايى بىرلەسكەن جۇمىس توبىن قۇرۋدى ۇسىنامىن»، - دەدى سەرىكباي قاجى وراز.
ونىڭ اتاپ وتۋىنشە، ۇلى جىبەك جولىنىڭ كوپ بولىگى ورتالىق ازيا مەن قازاقستان جەرىندە ورنالاسۋى حالقىمىزدىڭ مادەنيەتىن، رۋحاني مۇراسىن بايىتا ءتۇستى. قازاق توپتىراعىندا جازۋ، ساۋلەت، قول ونەرىنىڭ دامۋىنا وڭ اسەرىن تيگىزدى.
«وسىناۋ وڭ ۇدەرىس بايىرعى بابالارىمىزدىڭ ينتەللەكتۋالدى ومىرىنە وزگەرىس اكەلدى. الىستى جاقىن ەتىپ، ورتالىق ازيا مەن ەۋروپانى بايلانىستىرعان ساۋدا جولىنىڭ بويىندا تاريحي مەشىتتەر مەن كەسەنەلەر بوي كوتەردى. وتىرىقشىلىق مادەنيەت قالىپتاستى. وسى كەزەڭدە پايدا بولعان وتىرار، قازىرگى تۇركىستان، ساۋران، سايرام، تاراز سىندى قالالار تەك ساۋدا جولى بولىپ قالماستان دۇنيەجۇزى وركەنيەتىن توعىستىرىپ، ادامزات قوعامىنىڭ دامۋىنا وشپەس ۇلەس قوستى»، - دەدى ەلىمىزدىڭ باس ءمۇفتيى.
ايتا كەتەيىك، كونفەرەنسيا بارىسىندا ق م د ب ءتوراعاسى ۇلى جىبەك جولى ەلدەرىنىڭ رۋحاني كارتاسىن جاساۋدى ۇسىنعان بولاتىن.
