سۋدانداعى اسكەري توڭكەرىس: ەل پرەزيدەنتى ومار ءال- باشير قاماۋعا الىندى
پرەزيدەنت گۆاردياسىنىڭ باسشىسى، سونداي- اق بۇرىنعى قورعانىس ءمينيسترى ابدەل راحيم مۇحاممەد حۋسەيننىڭ تۇتقىندالعانى حابارلاندى. ەلدەگى «ۇلتتىق كونگرەسس» بيلەۋشى پارتياسىنىڭ باسشىسى احمەد حارۋن مەن سۋداننىڭ بۇرىنعى ۆيتسە- پرەزيدەنتى الي وسمان تاح تا ۇستالعان.
تەلەارنانىڭ دەرەگى بويىنشا، مەملەكەت باسشىسىن وسى ەلدە توڭكەرىس جاساعان اسكەريلەر قاماۋعا العان.
مىڭداعان ادام حارتۋم كوشەلەرىندە ءجۇر. مۇندا ەرەۋىل سەنبى كۇننەن بەرى بولىپ جاتىر.
تاياۋ ۋاقىتتاردا ەلدىڭ اسكەرى مەملەكەتتىك تەلەارنالار مەن راديولاردان رەسمي مالىمدەمە جاساۋى مۇمكىن. حارتۋمدا بىرنەشە ۋاقىت بۇرىن اسكەردىڭ باس قولباسشىلىعىنىڭ جابىق وتىرىسى باستالدى. وعان ءال- باشير قاتىسقان جوق.
ەل استاناسىنىڭ كوشەلەرىندە اسكەردىڭ قوسىمشا جاساقتارى تارتىلىپ، برونەتەحنيكا ورناتىلعان. حارتۋمنىڭ حالىقارالىق اۋەجايى جابىق تۇر.
