الماتى وبلىسىندا ۇرىلار مالداردى اۋىل سىرتىندا سويىپ اكەتىپ جاتىر
وقيعا پانفيلوۆ اۋدانىنداعى كەرىماعاش اۋىلىندا بولدى، دەپ حابارلايدى قازاقپارات ءتىلشىسى.
كەرىماعاش اۋىلىنىڭ تۇرعىنى نۇرلان بەيسەعۇلوۆتىڭ ايتۋىنشا، ءساۋىردىڭ 2 نەن 3 نە قاراعان ءتۇنى قوراسىندا تۇرعان ءۇش سيىرىن ۇرلاپ اكەتكەن.
«ەكى سيىرىم بۋاز بولعان. انە-مىنە تۋادى دەپ وتىرعانبىز. ال ءبىر سيىرىم تۋىپ بۇزاۋى جەتىم قالدى. ءۇش سيىردىڭ باسى، تەرىسى، ىشىندەگى بۇزاۋلارى، ىشەك-قارىنى ءبارى اۋىلدىڭ سىرتىندا جاتىر. پوليتسيالار كەلىپ ءتۇسىرىپ، ىزدەردى قاراپ، ىزدەستىرەمىز دەپ كەتتى»، - دەيدى نۇرلان بەيسەعۇلوۆ.
ال سول اۋىلدىڭ تۇرعىنى ورازاقىن وماشيەۆ تا ءساۋىردىڭ 4 ءى كۇنى تايىنشامدى قورادان ۇرلاپ اكەتتى دەيدى. كەرىماعاش اۋىلى حالقىنىڭ ايتۋىنشا، ۇرىلار مالداردى اۋىلدىڭ شەتىنە شىعار-شىقپاستان سويىپ اكەتۋدى ادەتكە اينالدىرعان.
«كەرىماعاش اۋىلىنداعى مال ۇرلىعىنا قاتىستى قازىرگى ۋاقىتتا قىلمىستىق ءىس قوزعالىپ، ق ر ق ك 188-بابىنا سايكەس سوتقا دەيىنگى تەرگەۋ امالدارى جۇرگىزىلىپ جاتىر. قازىرگى ۋاقىتتا وسى قىلمىسقا قاتىسى بار تۇلعالاردى انىقتاۋعا ارنالعان جەدەل ىزدەستىرۋ شاراسى ۇيىمداستىرىلۋدا»- دەدى الماتى وبلىستىق پوليتسيا دەپارتامەنتىنىڭ باسپا ءسوز حاتشىسى سەرىك ۇپيەۆ.
اۋىلدا مالمەن جان باققان حالىق ۇرىلاردىڭ تابىلاتىنىنا كۇدىكپەن قارايدى. سەبەبى، جەلتوقسان ايىندا دا تۋرا وسىلاي مالىمدى اۋىلدىڭ شەتىنە شىعارىپ سويىپ اكەتتى دەيدى جايىق بەيسەعۇلوۆ. ءبىراق ۇرىلار قولعا تۇسپەدى دەپ اشۋلى. ال قازىر مال ۇرلىعىنىڭ اشۋ دەرەگى قاتاڭ قولعا الىندى دەگەن وبلىستىق پوليتسيا دەپارتامەنتى سوڭعى 20 كۇندە 70 كە جۋىق ۇرلانعان مال يەسىنە قايتارىلعانىن جەتكىزدى.
