بۇل جولعى سايلاۋدىڭ ءجونى بولەك بولادى
ولاردىڭ پايىمىنشا، بۇل قازاقستاندا باستالعان بيلىك ترانزيتى جاعدايىندا كۇتىلىپ وتىرعان وقيعا ول الەمدە وڭ باعا الماق.
ودان بولەك، سايلاۋ ينۆەستيتسيالىق جانە بيزنەس احۋالعا اسەر ەتەدى. مامانداردىڭ زەرتتەۋىنشە، وتكەن جىلمەن سالىستىرعاندا ىشكى ينۆەستيسيا ەكى ەسە ازايىپ كەتىپتى، دەپ حابارلايدى ەۆرازيا.
سوڭعى كەزدەرى ەل اراسىندا «ءبىزدى نە كۇتىپ تۇر؟»، «ءارى قاراي نە بولادى؟» دەگەن سىڭايداعى ءارتۇرلى اڭگىمەنىڭ وربىگەنى جاسىرىن ەمەس. سەنات دەپۋتاتى ءبىرعانىم ءايتىموۆانىڭ سوزىنشە، الدا وتەتىن سايلاۋ وسى ەكىۇدايىلىق كۇيدەن اتتاپ وتۋگە مۇمكىندىك بەرمەك.
«قازىرگى تاڭدا تۇراقتى پرەزيدەنت ءالى بولعان جوق دەگەن اڭگىمە بولۋى مۇمكىن. سوندىقتان بۇل اڭگىمە بولماۋى ءۇشىن بارلىق ءبىزدىڭ ۇكىمەت، پارلامەنت، جەرگىلىكتى ورگاندار، حالىقتىڭ ءوزى الاڭداماي جۇمىس ىستەۋگە مۇمكىنشىلىك بەرەر ەدى»، - دەدى پارلامەنت سەناتىنىڭ دەپۋتاتى ءبىرعانىم ءايتىموۆا.
ال ساياساتتانۋشى ەرلان سايروۆ سايلاۋدىڭ بيىل جازدا وتكىزىلۋى ساياسي جۇيەنىڭ جەتىلۋىنە سەرپىن بەرەدى دەيدى. ونىڭ ايتۋىنشا، ساياسات ساحناسىندا جاڭا ەسىمدەر تانىلىپ، باسقارۋ فورماتى وزگەرۋى مۇمكىن.
«بۇل ءبىزدىڭ ەلىمىزدە جاڭا تۇرپاتتاعى بيلىكتىڭ قالىپتاسۋىنىڭ العىشارتى دەپ قاراستىرۋعا بولادى. سونىمەن بىرگە قازاقستان تاريحىندا ەڭ ءبىرىنشى رەت سايلاۋ بيۋليتەندەرىندە باسقا ءبىر فاميليالار پايدا بولادى. بۇل ءبىزدىڭ ەلىمىزدەگى قوعامدىق پروتسەسستەردەگى ەۆوليۋتسيالىق ەڭ ءبىرىنشى العىشارت»، - دەدى ساياساتتانۋشى ەرلان سايروۆ.
پوليتولوگ جۇمابەك سارابەكوۆانىڭ پىكىرىنشە، ساياسي دودانى بيىل وتكىزۋ بىرىنشىدەن، ەكونوميكالىق تۇرعىدا ءتيىمدى بولادى. سەبەبى، ءىرى بيزنەس وكىلدەرى مەن ينۆەستورلاردىڭ بيلىككە دەگەن سەنىمى نىعايا تۇسپەك. ودان بولەك ساياساتتانۋشى ەلىمىزدىڭ سىرتقى ساياساتتاعى باعىتتاردا كۇرت وزگەرىستەر بولمايتىنىنا سەنىمدى.
«جاڭا پرەزيدەنتتىڭ تاراپىنان قازاقستان بۇرىنعى كوپۆەكتورلى ساياساتىن جالعاستىرادى دەگەن ايقىن حابارلاما جىبەرىلدى. ودان بولەك ينۆەستورلاردى ايتساق بولادى»، - پوليتولوگ جۇمابەك سارابەكوۆ.
ال بەلگىلى اقىن، «جۇلدىز» جۋرنالىنىڭ باس رەداكتورى عالىم جايلىباي كەزەكتەن تىس سايلاۋى - ۋاقىت تالابىنان تۋعان ساياسي، الەۋمەتتىك، تاريحي ماڭىزدى بار شەشىم دەيدى.
«ماعان بۇگىنگى ۇندەۋدە ەڭ ۇناعانى پرەزيدەنت قاسىم-جومارت توقايەۆ سايلاۋدىڭ ادالدىعىنا كەپىلدىك بەرەمىن دەپ ايتتى. ءار وتباسى - كىشكەنتاي وتان، ۇلكەن وتانىمىزدى دۇرىس ادام باسقارعانىن جۇرتتىڭ امان بولعانىن قالامايتىن ۇلت جوق. الداعى سايلاۋلاردان بۇل جولعى سايلاۋدىڭ ءجونى بولەك»، - دەيدى اقىن عالىم جايلىباي.
ايتا كەتەرلىگى، وسى ۋاقىتقا دەيىن پرەزيدەنتتىك سايلاۋ 5 رەت ءوتتى. ونىڭ باسىم بولىگى كەزەكتەن تىس. ال، الداعى سايلاۋ ناۋقانىندا كىمنىڭ باعى جاناتىنى ازىرگە بەلگىسىز.
