مىڭداعان ادام پرەزيدەنت وتستاۆكاسىن تالاپ ەتتى
نارازىلاردىڭ پرەزيدەنت ومار ءال-ءباشيردىڭ وتستاۆكاسىن تالاپ ەتىپ، كوشەگە شىققانىنا ەكى كۇن بولعان. ەۋروپا وداعى سوڭعى ەكى كۇندە «بۇرىن-سوڭدى بولىپ كورمەگەن» كوپ ادامنىڭ جينالىپ، وزگەرىستى تالاپ ەتكەنىن مالىمدەدى.
«سۋدان حالقى ۇزاق جىلدار بويى ءتۇرلى قيىندىقتار الدىندا تاڭعالارلىقتاي جىگەر كورسەتتى» دەپ مالىمدەدى ەۋروپا وداعىنىڭ سىرتقى قيمىلدار بويىنشا قىزمەتى 7- ساۋىردە. «ۇكىمەت ناقتى قادامدار جاساي وتىرىپ، ولاردىڭ سەنىمىن اقتاۋى ءتيىس» دەلىنگەن مالىمدەمەدە.
ەل پرەزيدەنتى ومار ءال-باشير بۇعان دەيىن وتستاۆكاعا كەتۋدەن باس تارتىپ، ەگەر قارسىلاستارى بيلىككە كەلگىسى كەلسە، سايلاۋ ارقىلى كەلۋى ءتيىس دەپ مالىمدەگەن. سۋداندا باشير جانە ونىڭ ۇلتتىق كونگرەس پارتياسىنا قارسى نارازىلىق شارالارى 19- جەلتوقساننان بەرى تۇراقتى تۇردە ءوتىپ كەلەدى. پوليتسيا نارازىلاردى تاراتۋ ءۇشىن كوزدەن جاس اعىزاتىن گاز، پاتروندار قولدانعان. نارازىلىق شاراسى باستالعالى بەرى ونداعان ادام كوز جۇمعان.
«ازاتتىق»
