قازاق-قىرعىز شەكاراسىنداعى كولىك كەپتەلىسىنىڭ سەبەبى نەدە؟
«قازاق-قىرعىز شەكاراسىنداعى احۋالدى تۇسىندىرە كەتەيىن. بۇل جاعدايدىڭ قالاي باستالعانىن ايتا كەتسەم: وسى جىلدىڭ قاڭتار ايىنان باستاپ مەملەكەتتىك كىرىستەر ورگاندارى ۇقك قىزمەتكەرلەرىمەن بىرگە شەكارادا ەكونوميكالىق قاۋىپسىزدىك سالاسىندا باقىلاۋ جۇرگىزىپ كەلەدى. ەڭ الدىمەن، قوسىمشا سالىقتاردى تولەۋ ماسەلەسىنە توقتالسام. ماسەلەن، ەگەر بەلگىلى ءبىر تاۋار قىرعىز تاراپىنان ءبىزدىڭ ەلگە تاسىمالداناتىن بولسا، ولار قازاقستاندا مىندەتتى تۇردە قوسىمشا قۇن سالىعىن تولەۋى كەرەك. مىسالى، ترانزيت بويىنشا بەلگىلى ءبىر تاۋار قىرعىز رەسپۋبليكاسىنان رەسەيگە تاسىمالداناتىنى تۋرالى حابارلانادى دا، جۇك قازاقستان-رەسەي شەكاراسىنا جەتپەي جاتىپ، ءبىزدىڭ ەلدە قالىپ، ءبىزدىڭ نارىقتا «ءسىڭىپ كەتەدى». وسى سەبەپتى، قوسىمشا سالىق ماسەلەسىنىڭ باسى اشىق كۇيىندە قالادى»، - دەدى قۋات راحىموۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنا قاراعاندا، جۇكتەردىڭ قۇجاتتارىنا قاتىستى ماسەلە دە وزەكتى.
«مىسال ءۇشىن قىرعىز تاراپىنان بىزگە قۇجات بويىنشا ءبىر تاۋار كەلە جاتقانى حابارلانعانىمەن، ەلىمىزگە جەتكەندە الگى تاۋاردىڭ قۇجاتقا سايكەس ەمەستىگى انىقتالادى. دەمەك، تاۋارلاردىڭ مولشەرى، قۇنى باسقا بولىپ شىعادى. ودان بولەك، ءۇشىنشى ەلدەردەن قىرعىزستانعا جەتكىزىلەتىن تاۋارلارعا تالداۋ جۇرگىزىپ كوردىك. بۇل جاعدايدا تاۋاردى يمپورتتاۋدىڭ قۇرىلىمى قاتتى وزگەرىپ كەتتى مە دەگەن قاۋپىمىز بار. ءبىز تاۋاردىڭ كەدەندىك-باقىلاۋ قۇنىنىڭ تومەندەتىلىپ وتىرعانىنا قاتىستى ۇرەيىمىز جوق ەمەس. ماسەلەن، سوڭعى تالداۋ جۇمىستارىنا سۇيەنەر بولساق، وسى جىلدىڭ العاشقى توقسانىندا قىرعىزستانعا 9 مىڭ توننا گرەك جاڭعاعى جەتكىزىلگەن. ونىڭ ۇستىنە، كەلىسى ول جاقتا 41 تسەنت (ا ق ش- تىڭ اقشا بىرلىگى) بولعان. ال ءدال سول جاڭعاق ءبىزدىڭ ەلدە كەلىسىنە 90 تسەنتپەن ساتىلۋدا. مىنە، باقىلاۋ باعاسىندا بىزدە وسىنداي ايىرماشىلىق جاتىر»، - دەيدى ول.
قۋات راحىموۆ قىرعىز تاراپىنان جونەلتىلەتىن تاۋار شەكارادا مۇلدەم باسقا بولىپ شىعاتىنىنا الاڭداۋشىلىق ءبىلدىردى.
«وسىعان بايلانىستى 27- ناۋرىزدان باستاپ شەكاراداعى باقىلاۋ شارالارىن كۇشەيتتىك. 27- ناۋرىزدان 4- ساۋىرگە دەيىن 1080 گە جۋىق اۆتوكولىك وتكىزىلگەن ەدى. الايدا، 114 كولىك بىردەن كەرى بۇرىلىپ، قاداعالاۋ جۇمىستارىن جۇرگىزۋگە قارسى ەكەندىكتەرىن ءبىلدىردى. مىنە، ولار وسى ارەكەتتەرىمەن جۇك پەن تاۋار بويىنشا مۇلدە سايكەسسىزدىك بارىن مويىنداپ وتىر. ال قۇجات پاكەتى تولىق كولىكتەر 15-20 مينۋتتىڭ ىشىندە ءبىزدىڭ شەكارانى كەسىپ ءوتىپ، جولدارىن جالعاستىرۋدا»، - دەيدى ول.
ەسكە سالا كەتسەك، قر قارجى مينيسترلىگى مەملەكەتتىك كىرىستەر كوميتەتى قىرعىزستانمەن شەكارادا قالىپتاسقان اۆتوكولىكتەردىڭ كەپتەلىسىنە قاتىستى بۇعان دەيىن دە تۇسىنىك بەرگەن بولاتىن.
