الەمدەگى ەڭ تار ءۇش كوشە
بۇگىن قىزىقتى اقپارات رەتىندە ەڭ تار كوشەلەر جايلى ايتا كەتپەكپىز. كلاۋستروفوبيا دەگەن تۇسىنىك بار. بۇل - پاتولوگيالىق سيمپتوم. ياكي، ادام تەرەزەسى از نەمەسە تار بولمەدە، تار جەردە قالۋدان قورقادى. ونداي ادامدار ەسىككە جاقىن جۇرەدى. ەگەر دە بەلگىلى ءبىر جاعدايلاردا جابىق كەڭىستىكتەن شىعۋعا بولماسا (ليفت، ۇشاق، پوەزد ۆاگونى) قورقىنىش سەزىمى ءورشي تۇسەدى. ولار ءليفتتى پايدالانعاننىڭ ورنىنا باسپالداقپەن شىعىپ تۇسكەندى ءجون كورەدى. ادامدار توبىنان الشاق جۇرۋگە تىرىسادى. كلاۋستروفوبيانىڭ پايدا بولۋ سەبەبى بالا كەزدەگى پسيحيكالىق زاقىمعا، باستان وتكەرگەن قاۋىپتى جاعدايلارعا نەمەسە ادامنىڭ ءالسىز پسيحيكاسىنا بايلانىستى بولۋى مۇمكىن. كلاۋستروفوبياسى بار جاندار تار كوشەگە جاقىنداۋعا دا قورقاتىنى راس. دەگەنمەن كەي جاندار الەمنىڭ ەڭ تار كوشەلەرىمەن وتۋگە تىرىسىپ، قورقىنىشىن جەڭگىسى كەلەدى ەكەن.
3. كلانچيچ كوشەسى بۇل كوشەمەن كولىك، موتوتسيكل نەمەسە ۆەلوسيپەدپەن وتە المايسىز. سەبەبى كوشەنىڭ ەنى بار بولعانى 43 سانتيمەتر عانا. ەرەكشە كوشە حورۆاتيانىڭ ۆربنيك قالاسىندا ورنالاسقان.
2. شپرويەرحوفشتراسە گەرمانيانىڭ وڭتۇستىك- باتىسىندا ورنالاسقان رويتلينگەن قالاسىندا دا ەڭ تار كوشە بار. شپرويەرحوفشتراسە دەپ اتالادى. كوشەنىڭ كەي جەرىنىڭ ەنى - 50 س م، كەي تۇستارى ءتىپتى 31 سانتيمەتردى قۇرايدى. كوشە رەسمي تۇردە 1727 -جىلى ءىرى ءورت اپاتىنان كەيىن جوندەۋ كەزىندە پايدا بولعان دەسەدى. ال قالالىق قۇجاتتا "ءنومىرى 77- كوشە " دەپ تىركەلگەن.
1. اندروۋنو الەمدەگى ەڭ تار كوشە فرانسيانىڭ گاسسەن كوممۋناسىندا ورنالاسقان. بۇل ايماق ەلدىڭ وڭتۇستىك- شىعىسىنداعى تانىمال سەن- تروپە تۋريستىك اۋدانىنا جاقىن. اندروۋنو كوشەسىنىڭ ەڭ تار تۇسى 29 سانتيمەتردى قۇرايدى. بۇلار الەمدەگى ەڭ تار كوشەلەردىڭ ءبىر پاراسى عانا. تەك ءبىر ادام عانا وتە الاتىن كوشەلەر ەۋروپا قالالارىندا كوپتەپ كەزدەسەدى.
ەڭ تار كوشەلەردىڭ ۇزىندىعى كوپ بولا بەرمەيدى. الەمدەگى ەڭ قىسقا كوشە شوتلانديادا ورنالاسقان. ۋيك دەپ اتالاتىن كوشەنىڭ ۇزىندىعى - 2 مەتر 6 س م. ول كوشەنىڭ بويىندا "ماككەيز" قوناقۇيى ورنالاسقان. عيمارات 1883 -جىلى تراپەتسيا پىشىندەس بولىپ سالىنعان. 2006 -جىلى بۇل كوشە گيننەسس رەكوردتار كىتابىنا «الەمدەگى ەڭ قىسقا كوشە» بولىپ تىركەلگەن.
Massaget.kz
