ينە- ءجىپ، قايشى، شاحمات - پويىز جولاۋشىلارىنا قانداي قىزمەتتەر كورسەتىلۋى ءتيىس

ونىڭ ايتۋىنشا، مەدياورتالىق بىلتىردان بەرى جولاۋشىلاردى تەمىر جولدا تاسىمالداۋ قىزمەتىنىڭ ساپاسىن تەكسەرىپ كەلەدى.

«كولىك كوميتەتىنىڭ دەرەكتەرىنە سايكەس، ەلىمىزدە وبلىسارالىق جولاۋشىلاردىڭ تەمىر جول تاسىمالى 57 باعىت بويىنشا جۇرگىزىلەدى. ونى جۇزەگە اسىراتىن 9 تاسىمالداۋشىنىڭ 8 ءى  جەكە كومپانيالار (قامتۋ ۇلەسى%34) بولسا، بىرەۋى - «جولاۋشىلار تاسىمالى» ا ق (قامتۋ ۇلەسى% 66) ۇلتتىق تاسىمالداۋشىسى بار. وتكەن جىل كوميتەتپەن بىرلەسىپ، 101 پويىزدى تەكسەرىپ، 800 دەن استام كەمشىلىك تاپقان ەدىك. اسىرەسە، ەسكىرگەن، كىرلەگەن توسەك- ورىندار كوپ كەزدەستى. ناتيجەسىندە تاسىمالداۋشىلار 55 ميلليون تەڭگە ايىپپۇل تولەپ، بارلىق كەمشىلىك تۇزەتىلدى» ، - دەدى تولەگەن بايعۇلوۆ ەلوردادا سىبايلاس جەمقورلىققا قارسى ۇلتتىق بيۋرودا وتكەن باسپا ءسوز ءماسليحاتىندا.

سونىمەن بىرگە، مەدياورتالىق باسشىسى جولاۋشىلاردىڭ ءوز قۇقىقتارىن جەتە بىلمەيتىنىن، تۇسىندىرمە جۇمىستارىن كوپتەپ ۇيىمداستىرۋ قاجەتتىگىن اتاپ ءوتتى.

«ەڭ الدىمەن، جولاۋشىلار ارتىق ورىن المايتىن 7 جاسقا دەيىنگى بالانى تەگىن الىپ جۇرۋگە قۇقىلى. 7-15 جاس ارالىعىنداعى بالالار ءۇشىن بيلەت قۇنىنىڭ جارتىسى تولەنەدى. ءبىر ەرەسەك جانە ءبىر بالالار بيلەتى ءۇشىن 35 كەلىگە دەيىن قول جۇگىن الىپ جۇرۋگە بولادى. پويىز جۇرۋىنە 24 ساعاتتان ارتىق ۋاقىت بولسا، بيلەت قۇنىن تولىق قايتارىپ الۋعا بولادى. 6 ساعات ۋاقىت قالسا، بيلەت باعاسىنىڭ %50 قايتارىلادى» ، - دەدى ول.

 جولسەرىكتەردىڭ ۇيالى تەلەفوندى قوسىمشا اقىعا قۋاتتاۋى دا زاڭسىز. ۆاگون ءتيپى مەن پويىز ساناتىنا قاراماستان، جولاۋشىلار كۋپە ىشىندە تەلەفوندى تەگىن قۋاتتاۋعا قۇقىلى.

«جول ءجۇرۋ بيلەتىن كورسەتۋ ارقىلى ۆوكزال ىشىندەگى دارەتحاناعا دا تەگىن كىرۋگە بولادى. جانە بارلىق پويىزدىڭ دارەتحانالارىندا سابىن مەن قاعاز بولۋى مىندەتتى. دارەتحانانى جولسەرىك ءتورت ساعات سايىن تازالاپ تۇرۋى ءتيىس. سونداي- اق، جولسەرىك كەلۋشىلەرگە تەگىن ءشاي، ستاكان، قاسىق، ينە- ءجىپ، قايشى، ءدارى- دارمەك، ءتىپتى شاحمات، دويبى سەكىلدى ۇستەل ويىندارىن دا اكەلىپ بەرۋى كەرەك» ، - دەيدى ت. بايعۇلوۆ.

سونىمەن بىرگە، جولسەرىك قارتتارعا، مۇگەدەكتەرگە، جۇكتى جانە بالالى ايەلدەرگە توسەك سالىپ بەرۋى ءتيىس. قاجەت بولسا، ۇستىڭگى قاباتقا قاۋىپسىزدىك بەلبەۋىن ورناتادى.

  «پويىزدىڭ توقتاۋىنا جارتى ساعات قالعاندا توسەك- ورىندى وتكىزۋدى تالاپ ەتەتىن جولسەرىكتەر بار. زاڭ جۇزىندە جولسەرىك بۇل زاتتاردى جولاۋشىلار شىعىپ كەتكەن سوڭ، ءوزى جيناپ، كىر جۋاتىن جەرگە تاپسىرۋى ءتيىس. توسەك- ورىندى جارتى ساعات بۇرىن جيناۋ تەك شۇعىل جاعدايدا عانا جولاۋشىنىڭ رۇقساتىمەن جۇرگىزىلۋى كەرەك. ال جول ۇستىندە توسەك- ورىندى قايتا اۋىستىرۋ ءۇشىن قوسىمشا اقى تولەنۋى قاجەت. جولسەرىك ۇسىناتىن كوفە، كونديتەرلىك تاعامدار دا بولەك اقىعا بەرىلەدى. بۇل - زاڭدى» ، - دەپ ءتۇسىندىردى سپيكەر.

مەدياورتالىق باسشىسى جولاۋشىلار قۇقىعى بۇزىلعان وقيعالار جونىندە فوتو، ۆيدەو، اۋديو ماتەريالداردى 77020002494 WhatsApp نومىرىنە جولداۋدى سۇرادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى