رەسپۋبليكالىق ايتىستىڭ باس جۇلدەسىن قانات مىرزاحان جەڭىپ الدى
وبلىس ورتالىعىنداعى «بالاساعۇن» ورتالىق كونتسەرت زالىندا وتكەن شارانى «ايتىس اقىندارى مەن جىرشى، تەرمەشىلەردىڭ حالىقارالىق وداعى» رەسپۋبليكالىق قوعامدىق بىرلەستىگىنىڭ ءتوراعاسى ءجۇرسىن ەرمان جۇرگىزدى.
قازىلار القاسىنىڭ قۇرامىندا كومپوزيتور، قازاقستاننىڭ حالىق ءارتىسى التىنبەك قورازبايەۆ، ايتىسكەر اقىن، «دارىن» مەملەكەتتىك سىيلىعىنىڭ يەگەرى بەكارىس شويبەكوۆ، اقىن، جۋرناليست، «انا ءتىلى» گازەتىنىڭ باس رادەكتورى جاناربەك ءاشىمجان، ايتىسكەر اقىن، قازاقستان جازۋشىلار وداعىنىڭ مۇشەسى باۋىرجان حاليوللا، اقىن، قازاقستاننىڭ ەڭبەك سىڭىرگەن قايراتكەرى قايىربەك اسانوۆ جانە ايتىسكەر اقىن، ق ر مادەنيەت سالاسىنىڭ ۇزدىگى احمەتجان وزبەكوۆ بولدى. ولارعا بەلگىلى ايتىسكەر اقىن، قازاقستاننىڭ ەڭبەك سىڭىرگەن قايراتكەرى، «دارىن» مەملەكەتتىك سىيلىعىنىڭ يەگەرى امانجول التايەۆ ءتوراعالىق ەتتى.
الامان ايتىسقا اسپانبەك شۇعاتايەۆ (پاۆلودار وبلىسى) ، قاينار الاگوزوۆ (اقتوبە وبلىسى) ، ايبەك قاليەۆ (قوستاناي وبلىسى) ، ديدار قاميەۆ (قاراعاندى وبلىسى) ، تالعات مىقي، باۋىرجان شيرمەدين ۇلى (باتىس قازاقستان وبلىسى) ، ولجاس وتار (نۇر- سۇلتان قالاسى) ، مۇحتار نيازوۆ ( قىزىلوردا وبلىسى) ، نۇرلان ەسەنقۇلوۆ (تۇركىستان وبلىسى) ، قاجىمۇقان ابزالوۆ (شىمكەنت قالاسى) ، شۇعايىپ سەزىحمان (نۇر- سۇلتان قالاسى) جانە جامبىلدىق قانات مىرزاحان، اسحات قىلىشبەك، نۇرلىبەك قۇرمانوۆ، دارحان ءابدىمانات، شاپاعات ءابدىر، ەربول ەلشات، مەدەۋ مىرزاتاي سىندى بارلىعى 20 ايتىسكەر قاتىستى.
العاشقى اينالىمدا 20 اقىن 10 جۇپ بولىپ ايتىسىپ، ءوزارا ءسوز سايىستىردى. جوعارى ۇپاي العان 8 اقىن ەكىنشى اينالىمعا ءوتىپ، 4 جۇپ بولىپ ايتىستى. ولار: قاجىمۇقان ابزالوۆ - اسحات قىلىشبەكوۆ، ايبەك قاليەۆ - ديدار قاميەۆ، مۇحتار نيازوۆ - قانات مىرزاحان.
تارتىستى وتكەن فينالدىق ايتىستاردىڭ ناتيجەسىندە جامبىلدىق قانات مىرزاحان باس جۇلدەنى قانجىعاسىنا بايلاپ، «Hyundai Accent» ماركالى اۆتوكولىكتى جەڭىپ الدى.
ال قاراعاندىلىق ديدار قاميەۆ جۇلدەلى 1-ورىندى (1 ميلليون تەڭگە) ، قوستانايلىق ايبەك قاليەۆ، باتىستىق باۋىرجان شيرمەدين ۇلى جانە ەلوردالىق شۇعايىپ سەزىمحان ەكىنشى ورىندى ( 500 مىڭ تەڭگەدەن) يەلەندى. سونداي- اق شىمكەنتتىك قاجىمۇقان ابزالوۆ، نۇرلان ەسەنقۇلوۆ، جامبىلدىق اسحات قىلىشبەكوۆ جانە قىزىلوردالىق مۇحتار نيازوۆ ءۇشىنشى ورىنعا (300 مىڭ تەڭگەدەن) لايىق دەپ تابىلدى. وزگە دە ءبىرقاتار اقىندار ىنتىلاندىرۋ سىيلىقتارىنا يە بولدى.
