قازاق ارۋلارى ەلگە تۋريستەردى تارتۋدى قولعا الادى

 «قازاقستان ارۋى 2019» ۇلتتىق بايقاۋىنىڭ فينالى وتەتىن كۇن بەلگىلى بولدى. بايقاۋ 2 - مامىردا نۇر- سۇلتانداعى نوماد- حوللدا وتكىزىلمەكشى. بيىل «قازاقستان ارۋى 2019» بايقاۋى «الەم ارۋى» عالامدىق بايقاۋىنىڭ ۇتىمدى تاجىريبەسىن ەسكەرە وتىرىپ، جاڭا فورماتتا وتكىزىلەدى. سوڭعى جيىرما جىلدا بايقالعان جاڭالىق -  ءار ەلدە وتكىزىلەتىن «الەم ارۋى» تۋريستىك اعىندى ايتارلىقتاي ارتتىرىپ، ەكونوميكالىق كورسەتكىشتەردى وسىرگەن ەكەن. «الەم ارۋى» بايقاۋى بىرنەشە مارتە وتكىزىلگەن قىتايدىڭ سانيا قالاسى ءمەرى لي مىرزانىڭ پىكىرىنشە، شارا وتكەننەن كەيىن شەت ەلدەن كەلگەن تۋريستەر سانى بىردەن 40 پايىزدان، ال ۆاليۋتالىق كىرىس 70 پايىزدان اسقان. لي مىرزا ونى «بايقاۋدىڭ اسەرى» دەدى.

بيىلعى «قازاقستان ارۋى» ۇلتتىق بايقاۋىنىڭ ارنايى جوباسى بويىنشا ق ر مادەنيەت جانە سپورت مينيسترلىگىنىڭ قولداۋىمەن تانىمدىق- جارنامالىق روليكتەر جيىنتىعى جاسالادى. كوركەم، قىسقا فيلمدەردە وڭىرلىك تۋردىڭ جەڭىمپازدارى ءوز ءوڭىرىنىڭ تۋريستىك مۇمكىندىكتەرىن كورسەتەدى. مىسالى، «وسكەمەن ارۋى» بىرەگەي راحمان قاينارى تۋرالى، «اقتوبە ارۋى» « ءۇيتاس» تابيعي ەسكەرتكىشى تۋرالى، «شىمكەنت ارۋى» بايدىبەك اۋدانىنداعى «اق مەشىت» اۋليە ۇڭگىرى تۋرالى اڭگىمەلەپ بەرەدى. قىزدار ءوزىنىڭ تۋعان وڭىرلەرىنىڭ كورنەكتى جەرلەرىن بار مەيىرىممەن ءارى ماقتانىشپەن تانىستىرادى، ەرەكشە تابيعي جانە ارحەولوگيالىق نىسانداردى ءوز كوزدەرىمەن كورىپ، تاماشالاۋ ءۇشىن ساياحاتشىلاردى وزدەرىنىڭ تۋعان وڭىرلەرىنە شاقىرادى.

 

سونداي- اق جاڭا فورمات اياسىندا «دۇنيەجۇزى ارۋى» جانە «الەم ارۋى» سياقتى ءىرى الەمدىك بايقاۋلارعا ارنالعان تانىستىرىلىم روليكتەرى تۇسىرىلەدى، بۇل العاش رەت ۇلى دالانىڭ كيەلى جەرلەرىنە، قازاقستان رەسپۋبليكاسىنىڭ بىرەگەي گەوگرافيالىق جانە تابيعي لاندشافتتارىنا ارنالماق. وسى حالىقارالىق جوبالارداعى مەديا الاڭداردىڭ جوعارى رەيتينگىسى تۋريستەردىڭ بارىنشا اۋقىمدى اۋديتورياسىن شاقىرۋعا مۇمكىندىك بەرەدى.

 ا. احمەتقازى

www.aikyn.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى