ورتاعاسىرلىق ساۋران قالاشىعىندا تۇڭعىش رەت ەكسپەديتسيالىق فەستيۆال وتەدى
جەتى كۇنگە جوسپارلانعان فەستيۆال بارىسىندا تاريحى تەرەڭ تۇركىستان مەن ساۋران جايلى مول ماعلۇماتتار بەرۋگە ارنالعان كوپتەگەن شارالار قولعا الىنباق، دەپ حابارلايدى قازاقپارات ءتىلشىسى.
قازاقستاندىق جانە شەتەلدىك انشىلەردىڭ قاتىسۋىمەن وتەتىن شارا ХІІІ-ХVІІІ عاسىرلارعا ءتان ساۋران قالاشىعىن ناسيحاتتا مەن وندا تۋريستەردى كوپتەپ تارتۋعا ىقپال ەتۋ ماقساتىندا ۇيىمداستىرماق.
«ازىرەت سۇلتان» مەملەكەتتىك تاريحي-مادەني قورىق-مۋزەيىنە قاراستى قالاشىقتا وتەتىن اۋقىمدى فەستيۆالدى وتكىزۋدى «NOMAD» تۋريستىك ەكسپەديتسياسى قولعا الىپ وتىر. «وڭتۇستىك اڭىزدارى» جوباسى اياسىندا ۇيىمداستىرىلاتىن ەكسپەديتسيالىق فەستيۆالدىڭ گالا-كونسەرتى 25-26-ساۋىرگە جوسپارلانىپ وتىر. ونى تاماشالاۋعا 5 مىڭعا تارتا كورەرمەن شاقىرىلماق. شارانى ۇيىمداستىرۋشىلاردىڭ ايتۋىنشا، ساحنا ساۋران قالاشىعى بەينەسىندە جاسالىنادى. ەكسپەديتسيالىق كونتسەرتتىڭ تارتۋى رەتىندە تاريحي قالاشىق ماڭىنا جۇرگىنشى جولدار مەن مىڭداعان تال كوشەتتەرى وتىرعىزىلماق. ال، كونسەرت الاڭىنىڭ قۇرىلىسىن «BI Group» قۇرىلىس كومپانياسى جۇرگىزەدى دەپ كۇتىلۋدە.
ايتا كەتەيىك، ورتاعاسىرلىق ساۋران قالاسى تۇركىستان قالاسىنان سولتۇستىك-باتىسقا قاراي 46 شاقىرىم جەردە ورنالاسقان. ساۋران قالاشىعى - رەسپۋبليكالىق ماڭىزى بار ەسكەرتكىش سانالادى. قازىرگى تاڭدا تاريحي قالا قورعان قامالمەن قورشالعان. قالانىڭ قاقپالارى مەن بۇرىشتارىنا 7 قورعانىس مۇناراسى تۇرعىزىلعان، قامالىنىڭ ۇزىندىعى - 2360 مەتردى قۇرايدى. قامالدىڭ سىرتىندا تەرەڭدىگى 1-3 مەتر، ەنى 15-20 مەتر بولاتىن ور ىزدەرى ساقتالعان.
