ب. اتامقۇلوۆ بەيجىڭدە قىتاي ءتوراعاسىنىڭ ورىنباسارى ۋاڭ شيشانمەن كەزدەستى
بەيبىت اتامقۇلوۆ ەكى ەل اراسىندا ورتاق مۇددەلەرگە نەگىزدەلگەن ۇزاق مەرزىمدى دوستىق قارىم- قاتىناستىڭ ورناعانىن اتاپ ءوتتى.
قازاقستان قىتايدىڭ جەتىستىكتەرىن جوعارى باعالايدى، دامۋ جولىن نازارىندا ۇستايدى. سوندىقتان «ءبىر بەلدەۋ، ءبىر جول» باستاماسى مەن باسقا سالالارداعى ارىپتەستىكتى ارتتىرۋعا نيەتتى. كوپ تاراپتى مەحانيزمدەردىڭ اياسىنداعى ۇيلەسىمگە ىقپال ەتىپ، ەكى جاقتى قارىم- قاتىناستى جاڭا دەڭگەيگە كوتەرەدى - دەپ اتاپ ءوتتى بەيبىت اتامقۇلوۆ.
ال ۋاڭ شيشان قازاقستان مەن قىتاي دوستىعىنىڭ بەرىك، مەملەكەتارالىق ساياسي سەنىم مىعىم، ال كوشباسشىلاردىڭ ستراتەگيالىق باسشىلىعى مىقتى ەكەنىن ايتتى.
سونداي-اق، بەيجىڭدە قازاقستان سىرتقى ىستەر ءمينيسترىنىڭ ورىنباسارى ەرمەك كوشەربايەۆتىڭ قاتىسۋىمەن يندۋستريالاندىرۋ جانە ينۆەستيتسيا جونىندەگى XVI قازاق- قىتاي وتىرىسى ءوتتى. قازاقستاندىق دەلەگاتسيانى الدىمەن قىتايدىڭ دامۋ جانە رەفورما كوميتەتى ءتوراعاسىنىڭ ورىنباسارى نين سزيچجە قابىلدادى.
وتىرىستا تاراپتار بىرلەسكەن جوبالاردىڭ جۇزەگە اسىرىلۋ بارىسىن، سونداي- اق كەيبىرىن وڭتايلاندىرۋ جونىندەگى سۇراقتاردى قارادى. سونىمەن قاتار وندىرىستىك قۋاتتى ارتتىرۋ، ۆيزا ماسەلەلەرى سياقتى ماسەلەلەر تالقىلاندى. بۇدان بولەك ءساۋىردىڭ سوڭىندا بەيجىڭدە وتەتىن «ءبىر بەلدەۋ، ءبىر جول» 2-حالىقارالىق فورۋمىنىڭ اياسىندا مەملەكەت باسشىلارىنىڭ قاتىسۋىمەن وتەتىن كەزدەسۋدە ءوزارا قاراستىراتىن قۇجاتتاردى پىسىقتادى.
www.24.kz
