تالدىقورعان اكىمى داستان شالتابايەۆقا قاتىستى قىزمەتتىك تەكسەرىس باستالدى
بۇل جونىندە الماتى وبلىسى اكىمىنىڭ باسپا ءسوز حاتشىسى عالىمۇرات جۇكەل ءمالىم ەتتى، دەپ حابارلايدى قازاقپارات ءتىلشىسى.
«تالدىقورعان قالاسىنىڭ اكىمى داستان شالتابايەۆقا قاتىستى قىزمەتتىك تەكسەرىس اياقتالىسىمەن قوسىمشا تولىق مالىمەت بەرەتىن بولامىز. كەشە الماتى قالاسىندا توقتاتىلعان كولىكتىڭ ىشىنەن تاپانشا جانە دوللار اقشا تابىلعان. سول كولىكتى تىزگىندەگەن قالا اكىمىنىڭ ۇلى بولۋى مۇمكىندىگى ايتىلۋدا. ونىڭ داستان شالتابايەۆتىڭ ۇلى ما، جوق پا انىقتاپ جاتىر. سونداي-اق تابىلعان اقشانىڭ قايدان شىققانى، ونىڭ نە اقشا ەكەنى تەكسەرىلۋدە»، - دەدى عالىمۇرات جۇكەل.
دەگەنمەن، باسپا ءسوز حاتشىسى اقپارات راستالعان جاعدايدا قالا اكىمىنە ناقتى قانداي شارا قولدانىلاتىنىن ايتا المادى. ال داستان شالتابايەۆ اكىمدىك قىزمەتىن، ياعني جۇمىسىن جالعاستىرىپ جاتقانىن ءمالىم ەتتى.
ايتا كەتەيىك، 28 -ناۋرىز كۇنى الماتى قالاسىندا ءتارتىپ ساقشىلارى الدىنعى تەرەزەسى قاراڭعىلانعان Toyota Camry كولىگىن توقتاتقان. ءبىراق ونى تىزگىندەگەن ازاماتتا جۇرگىزۋشى كۋالىگى بولماعان جانە كولىكتىڭ ىشىنەن تراۆماتيكالىق تاپانشا مەن دوللار ۆاليۋتاسىندا اقشا تابىلعان.
«بۇل زاتتاردىڭ كىمگە تيەسىلى ەكەنىن ول تۇسىندىرە المادى. «مەنىكى ەمەس» دەپ اقتالدى. كولىكتىڭ ەسەپتەن شىعارىلعانى، الايدا قايتا تىركەلمەگەنى بەلگىلى بولدى. قازىر وعان قاتىستى ق ر ق ك 287-بابىنىڭ 2-بولىگىمەن قارۋ جاراقتى ساقتاۋ، ۇستاپ ءجۇرۋ، ساتۋ بويىنشا قىلمىستىق ءىس قوزعالدى. كولىك يەسى ماشيناسىن بىرەۋگە رۇقساتسىز بەرگەنى ءۇشىن اكىمشىلىك جاۋاپكەرشىلىككە تارتىلدى. كولىك ايىپ تۇراعىنا قويىلدى»، - دەدى قالالىق پوليتسيا دەپارتامەنتىنەن.
