ا ق ش رەسەيدى قاماۋعا الىنعان قىرىم تاتارلارىن بوساتۋعا شاقىردى
ۆاشينگتون رەسەيدى قاماۋعا الىنعان قىرىم تاتارلارى مەن «جازىقسىز سوتتالعان باسقا دا ۋكرايندىقتاردى» بوساتۋعا شاقىردى. بۇل تۋرالى ا ق ش مەملەكەتتىك دەپارتامەنتى باسشىنىڭ ورىنباسارى روبەرت پاللادينو ايتتى.
كەشە، 28- ناۋرىزدا، رەسەيدىڭ قول استىنداعى سيمفەروپولدەگى كيەۆ اۋداندىق سوتى قىرىم تاتارلارىنىڭ 23 بەلسەندىسىن 2003-جىلى رەسەيدە تىيىم سالىنعان حيزب ۋت-تاحرير يسلامشىل پارتياسى قىزمەتىنە قاتىسى بار دەگەن كۇدىكپەن 15- مامىرعا دەيىن قاماۋعا العان.
27- ناۋرىزدا قىرىمدا رەسەي فەدەرالدىق قاۋىپسىزدىك قىزمەتى (ف س ب)، ىشكى ىستەر مينيسترلىگى مەن روسگۆارديا قىزمەتكەرلەرى رەسەيدە جانە تاعى ءبىرقاتار ەلدە تىيىم سالىنعان «حيزب ۋت-تاحرير» ءدىني ۇيىمىنىڭ قىزمەتىنە قاتىسقان دەگەن كۇدىكپەن بىرنەشە تۇرعىننىڭ ءۇيىن تىنتىگەن.
رەسەي 2014-جىلى قىرىمدى اننەكسيالاعاننان كەيىن تۇبەكتە 31 جەرگىلىكتى مۇسىلمان «حيزب ۋت-تاحرير» ۇيىمىنا قاتىسى بار دەگەن كۇدىكپەن قۋدالاۋعا ۇشىراعان. ۋكراينادا بۇل ۇيىم ەمىن-ەركىن جۇمىس ىستەيدى.
بيىل 22- اقپاندا ف س ب «بيلىكتى كۇشتەپ باسىپ الماق بولعان» دەگەن ايىپپەن سەگىز ادامنىڭ ۇستىنەن ءىس قوزعاعان.
ۋكراينا بيلىگى «رەسەي قۇقىق قورعاۋ ورگاندارى بۇل وپەراتسياسى ارقىلى ادام قۇقىقتارىن بۇزۋدىڭ ەڭ ۇلكەن مىسالىن كورسەتتى» دەپ مالىمدەدى. ۋكراينا پرەزيدەنتى پەتر پوروشەنكو ازاماتتاردىڭ ءۇيىن ءتىنتۋ مەن ولاردى قاماۋعا الۋدى ماسكەۋدىڭ قىرىم تاتارلارىن جاپپاي قورقىتىپ-ۇركىتۋ اكسياسى دەپ اتادى.
رەسەيشىل قىرىم ۇكىمەتىنىڭ باسشىسى سەرگەي اكسەنوۆ «قۇقىق قورعاۋ ورگاندارىنىڭ ارەكەتىن تولىقتاي قولدايمىن، رەپرەسسيا تۋرالى ايتىلعان كەز كەلگەن اڭگىمە - جالعان» دەپ مالىمدەگەن.
«ازاتتىق»
