قوعام مەن بيلىك اراسىنداعى اشىق ديالوگتىڭ قاجەتتىلىگى ارتا ءتۇستى - مينيستر
«شىمكەنت قالاسىمەن بىرگە قوسقاندا تۇركىستان وبلىسى - قازاقستانداعى حالىق ەڭ كوپ تۇراتىن، حالىقتىڭ تىعىزدىعى وتە جوعارى، اسىرەسە ينۆەستيتسيا تارتۋ جاعىنان دامۋ كەلەشەگى وراسان زور ايماق سانالادى. تۇركىستان ءبىزدىڭ ەلدىڭ تۇرعىندارى ءۇشىن عانا ەمەس، بۇكىل تۇركى الەمى ءۇشىن كيەلى مەكەن ەكەنىن ۇمىتپايىق. بۇل رەتتە قاسىم- جومارت كەمەل ۇلى حالىقپەن كەزدەسۋ كەزىندە جەرگىلىكتى دەڭگەيدەگى شارۋالارمەن بىرگە جالپى ەلدىڭ دەڭگەيىندەگى جۇمىستار تۋرالى ءسوز قوزعادى. ماسەلەن، مەملەكەت پەن حالىقتىڭ قارىم- قاتىناسىنىڭ قاعيداتتارىن قايتا قاراۋ مىندەتى تاپسىرىلدى. بۇگىنگى تاڭدا بيلىك پەن قوعامنىڭ اراسىنداعى اشىق ءارى تۇسىنىكتى ديالوگتىڭ ايقىن قاجەتتىلىگى ايتارلىقتاي ارتا ءتۇستى. الەۋمەتتىك سۇرانىستىڭ قاجەتتىلىكتەرىن ءداستۇرلى امال- ادىستەر قاناعاتتاندىرا الاتىن ەمەس»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسىندا.
ءمينيستردىڭ ايتۋىنا قاراعاندا، وسى سەبەپتى اتالعان قارىم- قاتىناستىڭ جاڭا فورماتتارى ەنگىزىلۋى ابدەن ىقتيمال.
«پرەزيدەنت سونىمەن بىرگە جەمقورلىقپەن كۇرەس ماسەلەسىنە، ەلدىڭ ەكونوميكالىق دامۋى مەن وتكىر الەۋمەتتىك ماسەلەلەردى شەشۋگە جەكە توقتالعانىن اتاپ وتكىم كەلەدى»، - دەدى ول.
ەسكە سالا كەتسەك، وسىدان بىرنەشە كۇن بۇرىن قازاقستان رەسپۋبليكاسىنىڭ پرەزيدەنتى قاسىم- جومارت توقايەۆ تۇركىستان وبلىسىنىڭ اتقارۋشى ورگان باسشىلارىمەن، ارداگەرلەر جانە زيالى قاۋىم وكىلدەرىمەن كەزدەستى. پرەزيدەنت العاشقى ساپارىن نەلىكتەن تۇركىستاننان باستاعانىن تۇسىندىرگەن ەدى.
سونىمەن بىرگە، قاسىم- جومارت توقايەۆ اتالمىش ساپار كەزىندە وڭتۇستىك جۇرتشىلىعىنا جوسپارلارىن ايتىپ بەردى.
اۆتور: ايان بەكەن ۇلى
