ادامعا قارىم-قاتىناس نە ءۇشىن قاجەت؟
ادامزات قوعامىنىڭ قالىپتاسۋى.
قارىم- قاتىناس بولماسا، ادامزات قوعامى بولماس ەدى، وسىنىڭ ارقاسىندا جەكە اداممەن ءتىپتى بۇكىل ادامزات اراسىندا بايلانىس ورنايدى. قىزمەتتە، جالپى ومىردە كەز كەلگەن سالا قارىم-قاتىناسسىز وتپەيدى. ەگەر ادام ءوزى قالاماعاننىڭ وزىندە، ءومىر ءسۇرۋ ءۇشىن تىلدەسۋدىڭ ماڭىزى وتە زور.
العاشقى قاۋىم ادامدارى قالاۋىن ىم - يشارا ارقىلى بىلدىرەدى، كەيىنىرەك ول سويلەۋدىڭ دامۋىنا اسەر ەتىپ، ۇعىم پايدا بولادى دا، بەلگىلى ءبىر زاتتاردىڭ اتاۋى تۋادى. قارىم- قاتىناس - قوعامنىڭ وزەگى بولىپ تابىلادى. تاپ سول قارىم- قاتىناستىڭ ارقاسىندا ادام پسيحيكاسى مەن مىنەزى قالىپتاسادى، جەكە تۇلعا رەتىندە داميدى. تىلدەسۋ - ادامدى جەر بەتىندەگى باسقا جاراتىلىستاردان ەرەكشەلەيدى. وسىدان ادامدار ءبىر-ءبىرىن ۇعىسادى. تىلدەسۋ - بايلانىس ورناتۋ مەن اقپارات الماسۋعا مۇمكىندىك تۋعىزادى. وسى ارقىلى، ادام وزىنە تاجىريبە جيناقتايدى نەمەسە بولىسەدى.
ادامعا تابيعي قاجەتتىلىك.
قارىم-قاتىناس قوعام مەن ءومىردىڭ ارقاسىندا قالىپتاساتىن ادامعا تابيعي قاجەتتىلىك بولىپ تابىلادى. ادام ءوزىنىڭ كوپ ۋاقىتىن ۇجىمدا وتكىزەدى: وتباسى، مەكتەپ نەمەسە ستۋدەنتتىك ءومىر، ءوندىرىس ۇجىمى.
قارىم- قاتىناسسىز - دامىپ، مادەني تۇرعىدا جەتىلۋ مۇمكىن ەمەس. بۇعان مىسال، ماۋگلي - ادامزات قوعامىنان تىس ءومىر سۇرگەن. ونىڭ اعزاسىندا ءبارى قالىپتى، ءبىراق اقىل- وي، پسيحيكالىق دامۋى جاعىنان ارتتا قالىپ قويعان. بۇل - ادامدارمەن قارىم- قاتىناستىڭ جوقتىعى سالدارىنان.
قارىم-قاتىناستان قورقۋ - سوتسيوفوبيا.
ءبىر قاراعاندا، قارىم- قاتىناس جاساۋدىڭ ەشبىر قيىندىعى جوق سياقتى. ءبىراق، بۇل كەيبىر ادامدار ءۇشىن وتە اۋىر.
سوتسيوفوبيا ادامدارمەن تەز ءتىل تابىسىپ كەتە المايتىن جانداردا بايقالادى، ديالوگ قۇرۋدان قورقادى، قاتتى تولقيدى، تۇتىعىپ، كىدىرىپ قالا بەرەدى، وسىنىڭ اسەرىنەن كۇلكىلى جاعدايعا تاپ بولادى.
ونداي قورقىنىشپەن قوعامدا ءومىر ءسۇرۋ قيىن، مانساپقا جەتۋ جولىندا، جەكە ءومىرىن قۇرۋدا جولى بولماي جاتادى. مۇنداي كەلەڭسىزدىك العاش ءجاسوسپىرىم كەزدەن باستالادى. بۇل ەڭ قيىن كەزەڭ، بالا ۇلكەن ومىرگە العاشقى قادام جاساپ جاتقان كەزەڭ. ەگەر قوعام ادامدى تەرىس قابىلداسا، وندا ول ونىڭ بولاشاعىنا اسەر ەتەدى ياعني ادام قارىم-قاتىناستان قورقا باستايدى.
ورتادان الاستاپ قالماس ءۇشىن سويلەۋ ونەرىن مەڭگەرۋگە تۋرا كەلەدى. كوپشىل ادامدى ورتاسى جاقسى قابىلدايدى، ونداي اداممەن ءتىل تابىسىپ كەتۋ وڭاي، اڭگىمەلەيتىن ورتاق تاقىرىپ ۇنەمى تابىلادى. كوپشىل بولۋ بۇل - بىرلەسىپ قىزمەت اتقاراتىن ورتادا كەيبىر جوبالاردى تالداپ، تالقىلاۋ ءۇشىن وتە ماڭىزدى.
پايدالى كەڭەس
از سويلەپ، كوپ تىڭداي ءبىلىڭىز.
ستاتيستيكالىق زەرتتەۋلەرگە سۇيەنسەك، ادامداردىڭ كوپشىلىگى اڭگىمە - دۇكەن قۇرۋ كەزىندە وزىنە ەمەس اڭگىمەلەسۋشىگە كوپ كوڭىل اۋداراتىن اداممەن تىلدەسكەندى ۇناتادى ەكەن. ونىڭ اڭگىمەسىنە قىزىعۋشىلىق تانىتا وتىرىپ، سەنىمىنە كىرەدى. مۇمكىن، بولاشاقتا ول ادام سىزگە قىزىعۋشىلىق تانىتىپ، سوڭى دوستىق بايلانىسقا ۇلاسۋى دا عاجاپ ەمەس.
كوبىرەك سۇراقتار قويىڭىز.
قاراپايىم ءبىر سوزبەن جاۋاپ قايىراتىن سۇراقتار ەمەس، ءوز ويىن اشىق، تەرەڭ بىلدىرە الاتىنداي سۇراقتار قويىڭىز. مىسالى، كينو كورگەندى جاقسى كورەسىز بە؟ - دەگەن سۇراقتىڭ ورنىنا: قانداي كينو كورگەندى ۇناتاسىز؟ دەگەن سياقتى. مۇنداي جەڭىل سۇراقتار بەيتانىس اداممەن بايلانىستى جەڭىلدەتىپ، ءتىل تابىسىپ كەتۋگە جول اشادى.
سەنىمدى ادام ەكەنىڭىزدى كورسەتىڭىز.
سويلەسۋ بارىسىندا ەڭ ءتيىمدى ەرەجەلەردىڭ ءبىرى كوز ءتۇيىستىرۋ. ءسىز ونىڭ كوزىنە تۋرا قاراۋ ارقىلى، قىزىعۋشىلىعىڭىز بەن ادالدىعىڭىزدى دالەلدەي الاسىز. تۋرا قاراۋدان قاشقالاقتاپ، كوزدى تومەن سالۋ سەنىمسىزدىك پەن كۇيگەلەكتىكتى بىلدىرەدى.
ءوز اتىڭدى اتاعانداعى ەستىلەتىن دىبىس - ەڭ جاعىمدى دىبىس.
پسيحولوگتار، ءتيىمدى بايلانىستىڭ ماڭىزدى ەلەمەنتى - اڭگىمەلەسۋشىنى اتىمەن اتاۋ، - دەيدى. ادامنىڭ ەسىمى، قۋاتتى ەنەرگەتيكالىق كۇشكە يە، ءوزىن - ءوزى سايكەستەندىرۋ ەلەمەنتى بولىپ تابىلادى. ەسىمىن اتاۋ ارقىلى جۇگىنىپ، ءسىز ونىڭ ءوزىن باعالاۋ قاسيەتىن جوعارىلاتىپ، سەنىمدى قارىم-قاتىناس ورناتا الاسىز. قيسىندى دەپ ەسەپتەسەڭىز قۇلاققا جاعىمدى ەتىپ، ەركەلەتىپ، قىسقاشا ەسىممەن اتاساڭىز دا بولادى، مىسالى: ناز، مىنانىڭ..؟
وي-ءورىستى كەڭەيتۋ.
جان - جاقتى دامىعان ادام وي ءورىسىنىڭ كەڭدىگى مەن ءبىلىمىنىڭ ارقاسىندا اينالاسىمەن وڭتايلى قارىم-قاتىناس ورناتۋعا يكەمدى، دۇنيەتانىمى مەن كاسىبي باعىتى ءارتۇرلى ادامدارمەن دە بايلانىس جاساۋ وڭاي. ءبىلىمىڭدى تولىقتىراتىن گازەت - جۋرنالدار وقۋ، جاڭالىقتاردان حاباردار بولۋ ماڭىزدى. ءقازىر بۇعان جاعداي جاسالعان ينتەرنەتتەن قالاعانىڭدى ىزدەپ تابۋعا بولادى.
ءوزىڭىزدى ەركىن ۇستاڭىز، اڭگىمەلەسۋشىگە سەنىڭىز.
ادامداردىڭ كوپشىلىگى قارىم-قاتىناس جاساۋدا ءوزىن - ءوزى باقىلاۋدا ۇستايدى جانە جاعىمدى اسەر قالدىرۋعا تىرىسادى. بارىنە بەلگىلى ەرەجە ء«وزىڭدى ەركىن ۇستا» باقىلاۋدا ۇستاپ، جاقسى كورىنۋگە تىرىسۋ بوس اۋرەشىلىك، بۇكىل نازارىڭدى اڭگىمەلەۋشىگە اۋدار.
اڭگىمەگە قۇلاق قويىڭىز.
اڭگىمە- دۇكەن قۇرۋ كەزىندە پاراللەل ءىس- ارەكەت جاساۋعا تىرىسپاڭىز مىسالى، تەلەديدار قاراۋ، قاعازعا جازۋ. مۇنداي ارەكەت اڭگىمەلەسۋشىگە ۇنامايدى، سەلقوستىق تانىتتى دەپ ويلايدى دا اڭگىمەنى دوعارۋى مۇمكىن.
دايىنداعان: اسىل قامباروۆنا
