ءومىرزاق شوكەيەۆ اۋدان اكىمىنە تاپسىرما بەردى

ءوڭىر باسشىسى الدىمەن قۇركەلەس اۋىلدىق وكرۋگىندە ورنالاسقان «ابدرامان» شارۋا قوجالىعىن ارالاپ كوردى. شارۋاشىلىقتىڭ جۇمىسىمەن تانىسقان وبلىس اكىمى اۋداندا جىلىجايلاردا قۇلپىناي شارۋاشىلىعىن دامىتۋ بويىنشا سەمينارلار ۇيىمداستىرۋ كەرەكتىگىن اتاپ ءوتتى. وعان جەرگىلىكتى اكىمدىك تاراپىنان ءتيىستى شارالاردى قولعا الۋدى تاپسىردى. مۇنان سوڭ ءومىرزاق شوكەيەۆ داربازا اۋىلدىق وكرۋگىندە ورنالاسقان اسىل تۇقىمدى مال شارۋاشىلىعى جانە ءسۇت وندىرۋمەن اينالىساتىن «فيرما ساكەن» جاۋاپكەرشىلىگى شەكتەۋلى سەرىكتەستىگىنە ايالدادى.

 بۇگىندە اتالعان قوجالىقتىڭ مەنشىگىندە 1600-گە جۋىق گەكتار جەرى بار جانە مەكەمە جىلىنا 720 توننا ءسۇت وندىرۋگە قاۋقارلى. وزىق زاماناۋي تەحنولوگيامەن جۇمىس ىستەيتىن سەرىكتەستىكتىڭ يەلىگىندە 600-گە جۋىق ءىرى قارا مالى، 2 مىڭنان استام ۋاق مال بار. سونداي- اق، ايماق باسشىسى «قاپلانبەك» اۋىلدىق وكرۋگىندە ورنالاسقان «جابايى اتا» شارۋا قوجالىعىنىڭ دا جۇمىس بارىسىمەن تانىستى. 1,8 ميلليارد تەڭگە بولاتىن جوبا 2009 -جىلى جۇزەگە اسىرىلعان. قوجالىق جىلىنا  4200 توننا ءونىم ءوندىرىپ، نۇر- سۇلتان، الماتى قالالارىنا جانە سولتۇستىك وبلىستارعا، رەسەيگە جونەلتىپ كەلەدى.

 

سونىمەن قاتار، وبلىس باسشىسى قاپلانبەك وقۋ تاجىريبە شارۋاشىلىعى اۋماعىنان بوي كوتەرىپ جاتقان كوپقاباتتى تۇرعىن ۇيلەردىڭ قۇرىلىس جۇمىستارىمەن تانىستى. مۇندا 5 قاباتتى 45 پاتەرلى 13 تۇرعىن ءۇي سالىنىپ جاتىر. وتكەن جىلى باستاۋ العان قۇرىلىس بيىل اياقتالىپ پايدالانۋعا بەرىلەدى دەپ جوسپارلانۋدا. اۋداننىڭ ءبىرقاتار نىساندارىن ارالاپ شىققان وبلىس اكىمى جەرگىلىكتى بيلىك وكىلدەرىنە ءبىرقاتار تاپسىرمالار جۇكتەدى. سونىڭ ءبىرى اۋدان اۋماعىنداعى تازالالانعان سۋ ارنالارىنا ءتيىستى تالداۋلار جاساپ، تازالاۋ ناتيجەسىندە شىققان قوقىستاردى شىعارىپ تاستاۋ بولدى.

 سونداي- اق، ءوڭىر باسشىسى اۋدان اۋماعىنان اعىپ وتەتىن «كەلەس» وزەنىنىڭ بويىنداعى اپاتتى جەرلەردى انىقتاۋدى مىندەتتەدى. وزەن ارناسىن تىكتەپ، نىعايتۋ جۇمىستارىن ۇيىمداستىرۋدى قامتاماسىز ەتۋ كەرەك ەكەنىن ايتتى. ودان بولەك، اۋدانى اۋماعىنداعى رەسپۋبليكالىق، وبلىستىق ماڭىزى بار اۆتوموبيل جولدارىنا تالداۋ جاساپ، رەسپۋبليكالىق، وبلىستىق اۆتوجولدارىنا جوندەۋ جۇمىستارى جۇرگىزۋدى دە جۇكتەدى.

ەڭ باستىسى، اۋداندا جاڭادان سالىنىپ جاتقان كوپقاباتتى ۇيلەردىڭ ينفراقۇرىلىم ماسەلەسىن تەزدەتىپ شەشۋ كەرەكتىگىن اتاپ ءوتتى.

اۆتور: اينۇر اقبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى