گولان شىڭدارىن يزرايلدىڭ ءبىر بولىگى دەپ تانىعان ترامپ قاتاڭ سىنعا ۇشىرادى
ارتىنشا قاۋلىعا قول قويىپ، ءسوزىن ىسپەن بەكىتتى. يزرايل پرەمەر- ءمينيسترى بينيامين نەتانياحۋ اق ءۇي باسشىسىنا بۇل قادامى ءۇشىن العىس ايتتى.
ءبىراق ترامپ وسىلاي ايتتى ەكەن دەپ، دۇنيە وزگەرىپ كەتپەسى تاعى انىق. اتاعىنان كورى شاتاعى باسىم پرەزيدەنتتىڭ بۇل ارەكەتىنە قازىر قارسى شىققاندار باسىم. بۇدان بولەك، يزرايل مەن حاماس اراسىندا قاقتىعىستار ءورشي ءتۇستى. سيريا تاراپى بىردەن اشۋعا ءمىندى. ارتىنشا بۇل قۇجاتتىڭ ەشقانداي كۇشى جوق ەكەندىگىن مالىمدەدى. الەم ەلدەرى دە بۇل جاعدايدى سان- ساققا جۇگىرتىپ، پىكىر ءبىلدىرىپ جاتىر.
يزرايل پرەمەر- ءمينيسترى بينيامين نەتانياحۋدىڭ ا ق ش- قا ساپارى ءساتتى اياقتالدى. سەبەبى پرەزيدەنت دونالد ترامپ داۋلى ايماق سانالاتىن گولان شىڭدارىن يزرايلدىڭ ءبىر بولىگى دەپ تانىپ، قاۋلىعا قول قويدى. اق ءۇي باسشىسى «بۇل قادام ەلدەگى تەرروريستەرمەن كۇرەسۋ جولىندا كومەك بولادى» دەيدى. نەتانياحۋ بولسا دونالد ترامپتى قوستاپ، العىسىن جاۋدىردى.
دونالد ترامپ، ا ق ش پرەزيدەنتى:
- الدىمەن حاماس پالەستينالىق قوزعالىسىنىڭ شابۋىلىنان زارداپ شەككەن يزرايل حالقىنا كوڭىل ايتامىن. ەكى ورتادا بەيبىت تۇرعىندار قازا تاپتى. بۇل جارىلىس يزرايلدىڭ قاۋىپسىزدىك سالاسىندا قانداي قيىندىقتارمەن بەتپە- بەت كەلەتىنىن كورسەتتى. سول سەبەپتى يزرايلدى قورعاۋ ءۇشىن وسىنداي تاريحي قادام جاسادىم. مەملەكەت يران، سيريا جانە لاڭكەستىك ۇيىمداردان كەلەتىن قاتەرگە توتەپ بەرە الۋى كەرەك.
بينيامين نەتانياحۋ يزرايل پرەمەر- ءمينيسترى:
- يزرايل مۇنداي شابۋىلدارعا شىداپ وتىرا المايدى. زۇلىمدىققا مىندەتتى تۇردە جاۋاپ بەرەتىن بولامىز. مەملەكەت پەن ازاماتتارىمىزدى قورعاۋ ءۇشىن قولدان كەلگەنىن جاسايمىز. گولان شىڭدارى - يزرايلگە شابۋىل جاساۋ ءۇشىن قولايلى الاڭ. سول سەبەپتى بۇل ايماقتى ەلدىڭ ءبىر بولىگى دەپ تانۋ ءبىز ءۇشىن وتە ماڭىزدى.
قاۋلىعا قول قويىلىسىمەن، الەم بۇل جاڭالىقتى قىزۋ تالقىلاي باستادى. ويتكەنى گولان شىڭدارى - داۋلى ايماق. تاريحقا ۇڭىلسەك، 1200 شارشى شاقىرىم اۋماقتى الىپ جاتقان گولان شىڭدارى 1944 -جىلدان 1967 -جىلعا دەيىن سيريالىق كۋنەيترا پروۆينتسياسىنىڭ بولىگى بولعان. قازىرگى كەزدە يزرايلدىڭ بيلىگىندە. سول وتكەن عاسىرداعى التى كۇندىك سوعىس كەزىندە باسىپ العان. ءسويتىپ يزرايل كنەسەتتى «گولان شىڭدارى تۋرالى زاڭ» قابىلدايدى.
دەگەنمەن 17 - جەلتوقساندا ب ۇ ۇ- نىڭ قاۋىپسىزدىك كەڭەسى مۇنداي اننەكيا جارامسىز دەپ جاريالادى. بۇگىندە يزرايل دا، سيريا جاعى دا گولان شىڭدارىن ءوز ايماعى دەپ سانايدى.
نايم اكبيك، سيريانىڭ حالىقارالىق قۇقىق بويىنشا ساراپشىسى:
- گولان شىڭدارى ترامپتىڭ شەشىمىنە قاراماستان، سيريانىڭ ءبىر بولىگى بولىپ قالادى. سەبەبى ب ۇ ۇ باس حاتشىسىندا كارتانىڭ ءتۇپنۇسقاسى بار. گولان شىڭدارى - اگرەسسيا كورسەتۋ ارقىلى باسىپ الىنعان سيريانىڭ جەرى. سول سەبەپتى ترامپ بولسىن، كنەسەتىڭ بولسىن قاۋلىلارى جارامسىز. سيريا ءوز جەرىن وزگەگە وڭايشىلىقپەن بەرىپ، قاراپ وتىرا المايدى.
سيريا سىرتقى ىستەر ءمينيسترى ۆاليد ال- مۋاليم دە وسىنداي پىكىردە. ول ترامپتىڭ قاۋلىسى زاڭدى كۇشى جوق قۇر قاعاز دەپ باعالادى. ارتىنشا ب ۇ ۇ قاۋىپسىزدىك كەڭەسى، ەۋرووداق ەلدەرى، تۇركيا، يران جانە رەسەي ا ق ش پرەزيدەنتىنىڭ ارەكەتىن قاتاڭ سىناپ، ءوز پىكىرلەرىمەن ءبولىستى.
ماريا زاحاروۆا، ر ف س ءى م رەسمي وكىلى:
- دونالد ترامپ گولان شىڭىن يزرايلدىڭ ءبىر بولىگى دەپ تانىعان قاۋلىعا قول قويدى. بۇل ب ۇ ۇ قاۋىپسىزدىك كەڭەسىنىڭ رەزوليۋتسياسىنا جانە حالىقارالىق كەلىسىمگە قايشى ارەكەت. بۇل ارقىلى اق ءۇي باسشىسى تاياۋ شىعىستا جاڭا شيەلەنىستىڭ تۋىنداۋىنا جول بەرىپ وتىر.
ال بۇل كەزدە يزرايل مەن حاماس اراسىندا قاقتىعىستار بەلەڭ العان. كەشە تەل- اۆيۆ قالاسىنداعى تۇرعىن ۇيگە زىمىران ءتۇسىپ، جەتى ادام زارداپ شەكتى. ونىڭ ىشىندە ايەلدەر مەن بالالار بار. مۇنىڭ ارتىنان يزرايل حاماس شتاب- پاتەرى ورنالاسقان گازا سەكتورىنا سوققى جاسادى. پالەستيندىك جەتى ازامات جاراقات العان. كەيىننەن مىسىردىڭ قاتىسۋىمەن وق اتپاۋ رەجيمى ەنگىزىلدى دەپ حابارلانعان ەدى. دەگەنمەن بۇگىنگى كۇن دە تىنىش وتپەگەن سياقتى.
ستەفان ديۋجارريك، ب ۇ ۇ باس حاتشىسىنىڭ رەسمي وكىلى:
- ب ۇ ۇ باس حاتشىسى تاياۋ شىعىستاعى جاعدايعا بايلانىستى الاڭداپ وتىر. تۇرعىن ۇيگە جاسالعان شابۋىل بارىپ تۇرعان قاتىگەزدىك. ءبىز تاراپتاردى سابىرعا كەلىپ، ماسەلەنى بەيبىت تۇردە شەشۋگە شاقىرامىز. مىنە وسىنداي شابۋىلداردان سوڭ، دونالد ترامپ گولان شىڭدارىن يزرايلدىڭ ءبىر بولىگى دەپ تانۋ دۇرىس دەيدى. وسى ارقىلى لاڭكەستەردى تىيامىز دەگەندى العا تارتادى.
ءبىراق اق ءۇي باسشىسىنىڭ ارعى ويى قايدا جاتقانى بەلگىسىز. ال سي- ەن- ەن ارناسىنا سۇحبات بەرگەن ساراپشىلار نەتانياحۋ سايلاۋدا وزىنە رەيتينگ جيناۋ ءۇشىن دونالد ترامپقا الدەقانداي ۋادە بەرۋى دە مۇمكىن. ءبىراق ول قانداي ۋادە؟ ول دا بەلگىسىز. دەگەنمەن بىلايعى جۇرتقا ءادىل كورىنگىسى كەلەتىن اق ءۇي باسشىسىنىڭ كوكەيىندەگىسى دە كوپ ۇزاماي بەلگىلى بولۋى دا ابدەن مۇمكىن. ياعني ترامپتىڭ ءدال وسى ۋاقىتتا قاۋلىعا قول قويۋىنا ساياساتكەرلەر ۇلكەن كۇمانمەن قارايدى.
