قىزىلوردا وبلىسىندا ارال تەڭىزى كۇنى اتاپ ءوتىلدى
2017-جىلى قىزىلوردا وبلىسى اكىمدىگى مەن حالىقارالىق ارالدى قۇتقارۋ قورى اتالمىش قور قۇرىلعان 26- ناۋرىزدى ارال تەڭىزى كۇنى رەتىندە اتاپ ءوتۋ جونىندە ورتاق شەشىمگە كەلگەن ەدى. بۇل شەشىمدى حالىقارالىق تۇراقتى دامۋ فورۋمى قابىلدادى.
وسى ورايدا اتاۋلى كۇن قارساڭىندا «اقمەشىت-سىرداريا» ورتالىق مەشىتىنىڭ ماڭىندا 800 ءتۇپ الما اعاشى مەن ۇيەڭكى وتىرعىزىلدى. ا. توقماعامبەتوۆ اتىنداعى قالالىق مادەنيەت ۇيىندە «شالقار تەڭىز سىر شەرتەدى» اتتى مەرەكەلىك كەش ءوتتى. ءىس-شارا اياسىندا ارال تەڭىزى تۋرالى فيلمنىڭ كورسەتىلىمى، كورمە مەن كونسەرت كوپشىلىك نازارىنا ۇسىنىلدى.
سىر ءوڭىرىنىڭ تۇرعىندارى ەلباسى نۇرسۇلتان نازاربايەۆتىڭ قولداۋىمەن عاسىر جوباسى - سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ جوباسىنىڭ جۇزەگە اسقانىن جوعارى باعالايدى. 2005-جىلى ۇلكەن جانە كىشى ارال اراسىندا 13 شاقىرىمدى قۇرايتىن كوكارال بوگەتىن سالۋ ارقىلى وڭ ناتيجەگە قول جەتكىزىلدى.
2006-جىلدىڭ ناۋرىزىندا كىشى ارال تەڭىز دەڭگەيىنەن 42 مەترگە دەيىن كوتەرىلدى. ارال قالاسى مەن تەڭىز اراسى بۇرىن بوگەت قۇرىلىسى باستالعانعا دەيىن 75 شاقىرىم بولسا، بۇگىندە 17 شاقىرىمدى قۇرايدى. تەڭىزدىڭ تۇزدىلىعى ايتارلىقتاي تومەندەپ، بالىق كاسىبىن جانداندىرۋعا مۇمكىندىك پايدا بولدى. جەرگىلىكتى بالىق ءونىمى قازىر پولشا، گوللانديا، گەرمانيا، ليتۆا، گرۋزيا، ۋكراينا، رەسەي جانە قىتاي ەلدەرىنە ەكسپورتتالدى.
