موڭعوليا استاناسىندا جاڭا مەشىت بوي كوتەردى
مەشىت «موڭعوليا يسلام ءدىنى بىرلەستىگى» ۇيىمىنىڭ باستاماسىمەن سالىندى. وعان قاجەتتى قارجىنى شەتەلدەگى يسلام ەلدەرىنىڭ قايىرىمدىلىق قورلارى بولگەن.
«مەشىتتى سالۋداعى ماقسات - قازاقي ورتادان شالعايدا ءومىر ءسۇرىپ، تىرشىلىك ەتۋشى قانداستارىمىزدى رۋحاني نارمەن سۋسىنداتۋ، جاس ۇرپاقتىڭ بويىنا يماندىلىق دارىتۋ» ، - دەيدى اتالمىش ۇيىم ءتوراعاسى امانكەلدى قۋانىش ۇلى.
زاماناۋي ۇلگىدەگى ءدىني عيماراتتا جاماعاتپەن ناماز وقيتىن، ءدارىس وقيتىن بولمەلەر، سونداي- اق ءمايىت جۋاتىن، جانازا شىعاراتىن زالدار بار.
ايتا كەتەرلىگى، قازىرگى تاڭدا ۇلانباتىر قالاسىندا تۇراتىن قازاقتار سانى ون مىڭعا جۋىق. ولاردىڭ 6 مىڭعا جۋىعى - ستۋدەنتتەر. سونىمەن قاتار، سوڭعى كەزدە موڭعول اعايىنداردىڭ اراسىندا يسلام دىنىنە بەت بۇرا باستاعاندارى دا بار. بۇل دا وسىناۋ يگى ءىستىڭ جۇزەگە اسۋىنا سەبەپ بولعان. توقتالا كەتەتىن تاعى ءبىر جايت، 2006 -جىلى موڭعوليانىڭ ءۇشىنشى پرەزيدەنتى نامبارىن ەنحباياردىڭ باستاماسىمەن قاسيەتتى كىتاب «قۇران كارىم» العاش رەت موڭعول تىلىنە اۋدارىلعان بولاتىن.
