باقىتجان ساعىنتايەۆ جاستارمەن كەزدەستى
شارا بارىسىندا رەسپۋبليكالىق جاستار ۇيىمدارىنىڭ جەتەكشىلەرى مەملەكەتتىك حاتشىنى ءوز ۇيىمدارىنىڭ قىزمەتى جانە ولاردىڭ جاستار جىلى اياسىندا جۇرگىزىپ جاتقان جۇمىسى جونىندە حاباردار ەتتى.
ب. ساعىنتايەۆ مەملەكەت باسشىسىنىڭ تاپسىرمالارى بويىنشا بۇگىنگى تاڭدا جاستاردىڭ ءال-اۋقاتىن جاقسارتۋعا، ولاردىڭ ساپالى بىلىمگە، دەنساۋلىق ساقتاۋ قىزمەتىنە قول جەتكىزۋىنە، باسپانا جاعدايىن تۇزەتۋىنە، بوس ۋاقىتتارىنىڭ دۇرىس ۇيىمداستىرىلىپ، ومىردەن ءوز ورىنىن تابۋىنا باعىتتالعان ماڭىزدى الەۋمەتتىك جوبالار قاراستىرىلعانىنا توقتالىپ ءوتتى.
مەملەكەتتىك حاتشى ەلباسىنىڭ جاستار ساياساتى سالاسىندا العا قويعان مىندەتتەرىن ءتيىمدى جۇزەگە اسىرۋ ىسىندە مەملەكەتتىك ورگاندار مەن جاستاردىڭ ۇكىمەتتىك ەمەس ۇيىمدارى بىرلەسە كۇش-جىگەر جۇمساۋى قاجەتتىگىن ايتتى.
بۇل رەتتە ول ەلىمىزدىڭ بارلىق جاستارىن جاستار جىلى اياسىندا ىسكە اسىرىلىپ جاتقان جوبالارعا بەلسەنە اتسالىسۋعا، ءوز-ءوزىن جەتىلدىرۋ، ءبىلىم دەڭگەيىن كوتەرۋ جانە كاسىبي بىلىكتىلىگىن ارتتىرۋ جولىندا جاڭادان ەنگىزىلگەن «الەۋمەتتىك ليفت» مۇمكىندىكتەرىن پايدالانۋعا ۇندەدى.
كەزدەسۋ سوڭىندا مەملەكەتتىك حاتشى جاستار ەلىمىزدىڭ جاھاندىق باسەكەگە قابىلەتتىلىگىنىڭ ماڭىزدى فاكتورىنا اينالۋعا ءتيىس ەكەندىگىن اتاپ ءوتتى.
