اقمولا وبلىسىندا تۋريزم سالاسىن دامىتۋدىڭ نەگىزگى باعىتتارى انىقتالدى
مارات ءيعاليدىڭ ايتۋىنشا، اقمولا وبلىسى دەمالىس ورىندارىنا باي، قازاقستان رەسپۋبليكاسىنداعى تۋريستىك ايماقتاردىڭ ۇزدىك بەستىگىنە كىرەدى.
«وڭىردە تۋريزم سالاسىندا 700 دەن استام كاسىپورىن جۇمىس ىستەيدى. الدىن الا مالىمەتتەر بويىنشا، وتكەن جىلى اقمولا وبلىسىنا 1 ميلليوننان استام تۋريست كەلدى، دەپ اتاپ ءوتتى مارات يعالي. - وبلىستىڭ تۋريستىك ينفراقۇرىلىمىن دامىتۋ شەڭبەرىندە 2018-جىلى قۇنى 4,3 ميلليارد تەڭگە بولاتىن 32 ينۆەستيتسيالىق جوبا جۇزەگە اسىرىلىپ، 340 جۇمىس ورنى اشىلدى. وبلىس اۋماعىندا «بۋراباي»، «بۇيراتاۋ»، «كوكشەتاۋ» ءتارىزدى 3 مەملەكەتتىك ۇلتتىق تابيعي پاركى مەن قورعالجىن مەملەكەتتىك تابيعي قورىعى جانە 900 عا جۋىق مادەني ەسكەرتكىش بار».
سونىمەن قاتار، ايماق باسشىسىنىڭ ورىنباسارى اقمولا وبلىسى اكىمدىگى مەن «قازاۆتوجول» ۇ ق» ا ق اراسىندا كەلىسىم ارقىلى وبلىس اۋماعىندا «KazWay» مودۋلدى ءتيپتى، حالىقارالىق ستاندارتتارعا ساي 9 سەرۆيستىك پاۆيلون ورناتىلعانىن اتاپ ءوتتى. ونىڭ سوزىنشە، تۋريستىك سالادا «شۋچە-بۋراباي» كۋرورتتى ايماعىن دامىتۋعا ەرەكشە ءمان بەرىلەدى.
بۋراباي كۋرورتىنىڭ تارتىمدىلىعىن ارتتىرۋ جانە بيزنەستى تارتۋ ارقىلى جىل بويىنا جۇكتەمەنى قامتاماسىز ماقساتىندا «Four seasons» تۇجىرىمداماسى جۇزەگە اسىرىلۋدا. ۆيزيت ورتالىعىندا تاريحي-ولكەتانۋ مۇراجايى جانە بوتاي مادەنيەتى مۇراجايى قۇرىلىپ، «جايلاۋ» ەتنواۋىلى جانە اۆتوكەمپينگ اشىلدى. ستريت-فۋت جەلىسى (20 ساۋدا پاۆيلونى) ۇيىمداستىرىلدى. «AsiaWaters» كومپانياسى «Qulager Burabay» ەمدىك-اس سۋىمەن تۋريستىك نىسانداردى قامتاماسىز ەتۋدى قولعا الدى. «Hotel Plaza» ءقوناقۇي كەشەنىندە ەلىمىزدەگى تۇڭعىش «تۋريزم جانە سەرۆيس اكادەمياسى» اشىلدى.
قىزمەت قۇنىن ازايتۋ ماقساتىندا تۋرپاكەتتەردى 50 پايىزعا دەيىن ارزانعا ساتاتىن «Burabay City Pass» ەلەكتروندى جەلىسى ىسكە قوسىلدى. بۋراباي كەنتىندە (14 گ ا) جاڭا شاعىناۋداننىڭ قۇرىلىسى باستالىپ، ورتالىق الاڭ مەن كوشەلەر اباتتاندىرىلدى. بۋراباي كولىنىڭ جاعاجاي اۋماعىندا 2 اللەيا سالىنىپ، قاتتى تۇرمىستىق قالدىقتاردى ەكى ءبولىپ جينايتىن جوبا جۇزەگە اسىرىلۋدا. «I love Burabay» شاعىن ساۋلەت ەسكەرتكىشتەرى مەن اقپاراتتىق بەلگىلەر ورناتىلدى.
«وسى باسىمدىقتار ارقىلى الداعى جۇمىستارىمىزدىڭ باستى باعىتتارى انىقتالدى. ونىڭ باستىلارىنىڭ ءبىرى - «شۋچە - زەرەندى» اۆتو جولىنىڭ قۇرىلىسى. تۋريستىك نىسانداردىڭ قولجەتىمدىلىگىن ارتتىرۋ جانە ونداعى قىزمەت قۇنىن ارزانداتۋ باعىتىندا تۋريستىك نىساندارعا سەرتيفيكات بەرۋ شاراسى قولعا الىنۋدا. تۋريزم سالاسىندا ينۆەستيتسيالىق جوبالاردى جۇزەگە اسىرۋ ءۇشىن ينۆەستورلاردى تارتۋ بويىنشا جۇمىستار جۇرگىزىلۋدە. قازاقستان وڭىرلەرى مەن رەسەيدىڭ شەكارالاس ايماقتارىمەن ارىپتەستىك اياسى كەڭەيە تۇسۋدە. ءوڭىردىڭ تۋريستىك الەۋەتىن ارتتىرۋدا الەۋمەتتىك جەلى بەلسەندى تارتىلاتىن بولادى»، - دەپ تولىقتىردى م. يعالي.
