استانادا قوعامدىق كولىك جۇرگىزۋشىلەرى تاپشى
«اۆتوبۋس جۇرگىزۋشىلەرى ەڭبەك تۋرالى زاڭعا سايكەس جۇمىس ىستەمەيدى. ولار ءتيىستى نورمادان ارتىق جۇمىس ىستەگەندىكتەن دۇرىس دەمالمايدى. بۇنىڭ بارلىعى اۆتوبۋس جۇرگىزۋشىلەردىڭ جەتىسپەۋشىلىگىنەن. بۇگىندە قالاداعى 8 اۆتوپاركتە بارلىعى 1678 جۇرگىزۋشى جۇمىس ىستەيدى، بىزگە تاعى 790 اۆتوبۋس جۇرگىزۋشىسى كەرەك. ەگەر اۆتوپاركتەرگە سۋبسيديا بەرىلسە، تاپشىلىق ماسەلەسى از دا بولسا شەشىلەدى»، - دەدى ج. جالبىر قالالىق ءماسليحاتتىڭ وتىرىسىندا.
ونىڭ ايتۋىنشا قوعامدىق كولىك جۇرگىزۋشىلەرى نەگىزگى مىندەتتەرىنەن بولەك، اۆتوبۋستى جۋۋ، جانار ماي قۇيۋ جانە جوندەۋ جۇمىستارىن دا قوسا اتقارادى.
«ولار تاڭعى 5 تە جۇمىسقا شىققاننان كەشكى 10-11 گە دەيىن توقتاۋسىز جۇرەدى. ودان كەيىن، اۆتوبۋستىڭ جانار مايىن قۇيىپ، ونى جۋىپ ەرتەڭگە دايىنداپ قويادى. ۇيىنە بارامىن دەگەنشە تۇنگى 2 گە تايايدى، سودان 2-3 ساعات ۇيقىدان سوڭ قايتا تۇرۋعا تۋرا كەلەدى. وسىدان دا قالادا قوعامدىق كولىكپەن اپاتتى جاعدايلار ءجيى ورىن الادى. ءبىز وسى تۇرعىدا تالداۋ جۇمىستارىن جۇرگىزدىك. ونىڭ ناتيجەسى بويىنشا %72 جۇرگىزۋشىنىڭ جۇيكە جۇيەسى ادامدارمەن جۇمىس ىستەۋگە جانە ولاردى تاسىمالداۋعا سايكەس كەلمەيدى. تالاپ بويىنشا ولار جول بويى 360 گرادۋستا جان-جاعىن باقىلاۋدا ۇستاپ وتىرۋى قاجەت»، - دەدى ول.
استانا LRT وكىلىنىڭ سوزىنە سەنسەك، قوعامدىق كولىك جۇرگىزۋشىلەرى جەتىسپەۋشىلىگىنىڭ تاعى ءبىر سەبەبى - جالاقىنىڭ از بولۋى.
«قازىرگى كۇنى جۇرگىزۋشىلەر كوندۋكتور قىزمەتىن قوسا اتقارادى. وسى ورايدا ولاردىڭ قىزمەتتىك فۋنكتسياسىن قايتا قاراپ جالاقىلارىن سوعان سايكەس ەسەپتەۋ كەرەك. بىزدەگى جۇرگىزۋشىلەردىڭ %80 وڭىردەن كەلگەندەر، ارينە ولاردىڭ باستى پروبلەماسى باسپانا. سوندىقتاندا بۇل جەردە ماسەلەنى كەشەندى تۇردە شەشۋ كەرەك. سونداي-اق، ءبىز جۇرگىزۋشىلەردىڭ قىزمەتتىك يميدجىن كوتەرۋ ماقساتىندا ولاردىڭ زەينەتكەرلىككە شىعۋ جاسىن تومەندەتۋدى ۇسىنۋدامىز»، - دەيدى ورتالىق باسشىسى.
اتالعان ۇيىمنىڭ دەرەگىنە سۇيەنسەك، وتكەن جىلى استانادا قوعامدىق كولىكتە ورىن العان جول اپاتى وقيعاسى %18 تومەندەگەن. اتاپ ايتقاندا، 2018-جىلى 1632 جول-كولىك وقيعاسى ورىن الىپ، ونىڭ 566 نا اۆتوبۋس جۇرگىزۋشىلەرى كىنالى دەپ تانىلدى.
