سەرپىن باعدارلاماسىنىڭ گرانتتارى يگەرىلمەي جاتىر - ب ع م

ق ر ءبىلىم جانە عىلىم ۆيتسە-ءمينيسترى تالعات ەشەنقۇلوۆتىڭ ايتۋىنشا، بۇگىندە «سەرپىن» باعدارلاماسىنا مەملەكەتتىك تاپسىرىستىڭ 10 پايىزى بولىنەدى. ال مەملەكەتتىڭ تاپسىرىسى ارتقان سايىن گرانتتاردىڭ سانى وسەدى. وسىنىڭ ناتيجەسىندە «سەرپىنگە» تيەسىلى 10 پايىزدىڭ كولەمى دە ارتادى. ءبىراق اتالعان گرانتتار تولىعىمەن يگەرىلمەيدى.

«ماسەلەن، بىلتىر اتالعان باعدارلاما اياسىندا 5089 گرانت ءبولىندى. الايدا ونىڭ تەك 67 پايىزى عانا يگەرىلدى. سەبەبى «سەرپىنگە» قاتىسۋعا نيەت بىلدىرەتىن جاستار از»، - دەدى ت. ەشەنقۇلوۆ بۇگىن ق ر پارلامەنت ماجىلىسىندە وتكەن دوڭگەلەك ۇستەلدە.

ونىڭ ايتۋىنشا، جەرگىلىكتى اتقارۋشى ورگاندار قاجەتتى ماماندىقتاردى جاقسى بىلەدى. سوندىقتان گرانت ءبولۋدى اكىمدىكتەرگە بەرۋگە بولادى. ال قارجىنى تىكەلەي ترانسفەرتپەن اۋدارىپ وتىرۋعا مۇمكىندىك بار.

«ءبىز «سەرپىن» باعدارلاماسىنىڭ گرانتتارىن ماقساتتى ترانسفەرتپەن جەرگىلىكتى اتقارۋشى ورگاندارعا اۋدارۋدى ۇسىندىق. ءبىراق قارجى مينيسترلىگى ول باستامامىزدى قولداعان جوق. وسى ماسەلەنى ءالى دە تالقىلاپ، ءبىر شەشىمگە كەلەمىز دەگەن ءۇمىتىمىز بار»، - دەپ اتاپ كورسەتتى ت. ەشەنقۇلوۆ.

ايتا كەتەيىك، بيىل ءبىلىم گرانتتارىن تاعايىنداۋ جۇيەسىندە وزگەرىستەر بولادى. جوعارى وقۋ ورىندارىن جان باسىنا قاراي قارجىلاندىرۋ جۇيەسىنە باسىمدىق بەرىلەدى. ماسەلەن، ۇ ب ت- دا جوعارى ۇپاي العان مەكتەپ تۇلەگى قاي وقۋ ورنىن تاڭداسا، سول جەرگە گرانت بەرىلەدى.

«وتكەن جىلى اتالعان باستاما ماگيستراتۋرادا 21 ماماندىق بويىنشا سىناقتان وتكىزىلگەن بولاتىن. بيىل زاڭ نورمالارى بويىنشا ماگيستراتۋرا ءبولىمى گرانت تاعايىنداۋدىڭ جاڭا مودەلىنە تولىعىمەن كوشەدى»، - دەيدى ت. ەشەنقۇلوۆ. بۇدان بولەك، مەكتەپ تۇلەكتەرىنە ماماندىقتى تاڭداۋ جاعى جەڭىلدەي تۇسەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى