قازاقستاندا جۇمىسسىز جۇرگەندەردىڭ ۇشتەن ءبىرى - جوعارى ءبىلىمى بار ادامدار
بۇگىندە وسى جۇمىسپەن ەكى مينيسترلىك اينالىسادى. ق ر ەڭبەك جانە حالىقتى الەۋمەتتىك قورعاۋ مينيسترلىگى نارىقتىڭ سۇرانىسىن كورسەتسە، ق ر ءبىلىم جانە عىلىم مينيسترلىگى سوعان قاراي گرانتتاردى تاراتىپ وتىرادى، دەپ حابارلايدى قازاقپارات ءتىلشىسى.
ق ر ءبىلىم جانە عىلىم ۆيتسە-ءمينيسترى تالعات ەشەنقۇلوۆتىڭ ايتۋىنشا، بۇگىندە ق ر ەڭبەك جانە حالىقتى الەۋمەتتىك قورعاۋ مينيسترلىگى ماماندارعا دەگەن سۇرانىستىڭ بولجامىن ۇسىنادى. ءبىراق ول مامانداردىڭ ءبىلىم دەڭگەيى، ناقتى ماماندىعى مەن كلاسيفيكاتسياسىنا قاتىستى مالىمەتتەر جوق.
«سونىڭ سالدارىنان ءبىز ناقتى ماماندىقتار مەن ولاردىڭ ءبىلىم دەڭگەيى بويىنشا سۇرانىستى كورە المايمىز. بۇدان بولەك، مەملەكەتتىك ورگاندار، جەرگىلىكتى اتقارۋشى ورگاندار مەن ۇلتتىق كومپانيالار اعىمداعى سۇرانىستى ۇسىنادى. ال ول مامانعا ءتورت جىلدان كەيىن سۇرانىس بولا ما، جوق پا، وسى ماسەلەنى ەسكەرمەيدى. وسىنىڭ سالدارىنان بۇگىندە جوعارى وقۋ ورىندارىنىڭ تۇلەكتەرىنە تولىققاندى سۇرانىس بولمايدى. سوندىقتان ەڭبەك نارىعىنا قاجەتتى ماماندارعا بولجام جاساۋ تەتىكتەرىن وزگەرتۋ كەرەك»، - دەدى ت. ەشەنقۇلوۆ ق ر پارلامەنت ماجىلىسىندە وتكەن دوڭگەلەك ۇستەلدە.
ال دەپۋتات ءجاميليا نۇرمامبەتوۆانىڭ سوزىنە قاراعاندا، ەكى مينيسترلىك وزىنە جۇكتەلگەن جۇمىستى ويداعىداي اتقارسا، ەڭبەك نارىعىندا جۇمىسسىزدىق ماسەلەسى بولمايدى. سەبەبى ەڭبەك نارىعىنا قاراي ءبىلىم گرانتتارى تاراتىلعاننان كەيىن جوعارى وقۋ ورىندارىن بىتىرگەن جاستار بىردەن جۇمىسقا تۇرۋى ءتيىس. ءبىراق بۇگىندە وسى سالاداعى ۇسىنىس پەن سۇرانىس ءارتۇرلى بولىپ تۇر.
«ماسەلەن، اۋىلدىق كۆوتامەن ءبىلىم العان جاستاردى الايىقشى، ءۇش جىلدىڭ ىشىندە اتالعان كۆوتامەن 10719 ادام جوعارى ءبىلىم الىپ شىقتى. الايدا ولاردىڭ تەك 25 پايىزى عانا جۇمىسقا تۇردى. ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنە سايكەس، ەلىمىزدە 441893 جۇمىسسىز ادام بار. ولاردىڭ 30 پايىزى - جوعارى ءبىلىمى بار ازاماتتار. ال 2017 -جىلدا جۇمىس بەرۋشىلەردە 26 مىڭ بوس جۇمىس ورنى بولدى. سەبەبى ۇمىتكەرلەردىڭ ءبىلىمى سول ۆاكانسيالارعا سايكەس كەلمەدى. جۇمىس بار، ءبىراق ادامنىڭ العان ءبىلىم كەلمەيدى. مەملەكەتتىك تاپسىرىستى ءتيىمدى ۇيلەستىرمەۋدەن وسىنداي پروبلەمالار تۋىندايدى»، - دەپ اتاپ كورسەتتى ج. نۇرمامبەتوۆا.
ايتا كەتەيىك، بيىل ءبىلىم گرانتتارىن تاعايىنداۋ جۇيەسىندە وزگەرىستەر بولادى. جوعارى وقۋ ورىندارىن جان باسىنا قاراي قارجىلاندىرۋ جۇيەسىنە باسىمدىق بەرىلەدى. ماسەلەن، ۇ ب ت- دا جوعارى ۇپاي العان مەكتەپ تۇلەگى قاي وقۋ ورنىن تاڭداسا، سول جەرگە گرانت بەرىلەدى. بۇدان بولەك، مەكتەپ تۇلەكتەرىنە ماماندىقتى تاڭداۋ جاعى جەڭىلدەي تۇسەدى. سونىمەن قاتار، جيىندا «سەرپىن» باعدارلاماسىنىڭ گرانتتارى يگەرىلمەي جاتقاندىعى ايتىلدى.
