ەۋروپاداعى ساتۋشىسىز دۇكەندەر قازاقستاندا دا اشىلدى - بەكتەنوۆ
بۇل تۋرالى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ورىنباسارى ولجاس بەكتەنوۆ ايتتى.
«سىبايلاس جەمقورلىق دەڭگەيىن ازايتۋدا قوعامدىق سانانى وزگەرتۋ ماڭىزدى. بۇل باعىتتا ساتۋشىسى جوق ادالدىق دۇكەندەرىنىڭ اشىلۋى ۇلكەن جاڭالىق بولدى. دۇكەنگە ەش باقىلاۋ جاسالمايدى جانە تاۋار العان ادام دا اقشانى ءوز ەركىمەن تولەپ كەتۋى ءتيىس. وسىلايشا ادامداردىڭ بويىندا مورالدىق قاسيەتتەر داميدى، پاراساتتىلىق قالىپتى ءومىر سالتىنا اينالادى» ، - دەدى ولجاس بەكتەنوۆ سىبايلاس جەمقورلىققا قارسى ۇلتتىق بيۋرودا وتكەن بريفينگتە.
ول ەۋروپا ەلدەرىندەگى ادال ساۋدا تۋرالى بەينەروليكتىڭ قازاقستاندا كەڭىنەن تالقىلانعانىن ەسكە سالدى.
«وتكەن جىلى WhatsApp» جەلىسىندە ەۋروپالىقتاردىڭ گۇل القابىنان قاجەتتى گۇلدى الىپ، باقىلاۋ مەن كامەرا بولماسا دا ءتيىستى اقشانى قالدىرىپ كەتەتىنى قىزۋ تالقىلاندى. قازاقستاندا مۇنداي تاجىريبە جۇزەگە اسپايدى دەپ كەسىپ ايتتى. ادالدىق دۇكەندەرى اشىلعاندا دا سەنبەگەندەر تابىلدى. حالىقتىڭ مۇنداي جۇيەگە دايىن ەمەستىگىن جەتكىزدى. ناتيجەسىندە 3 ايدا ەلىمىزدە 3455 ادالدىق دۇكەنى اشىلدى» ، - دەدى و. بەكتەنوۆ.
دۇكەندەر وقۋ ورىندارى مەن مەملەكەتتىك ورگانداردا كوپتەپ اشىلعان.
«ءتىپتى بۇل باستاماعا قاۋىپپەن قاراعان كاسىپكەرلەر كوزقاراسىن وزگەرتتى. الماتى مەتروسىندا «ادالدىق تۋرنيكەتى» اشىلدى. ناتيجەسىندە، وڭ وزگەرىستەرگە قوعامىمىزدىڭ دايىن ەكەنىن، قازاقستاننىڭ ەشبىر ەلدەن كەم تۇسپەيتىنىن كورىپ وتىرمىز» ، - دەدى ولجاس بەكتەنوۆ.
