ۇشاقتا شىلىم شەككەن ايەل جولىنان قالدى
«قاراعاندى قالاسى اۋەجايىنىڭ جەلىلىك پوليتسيا بولىمىنە «ەير استانا» اۋە كومپانياسىنىڭ «الماتى-قاراعاندى» باعىتىندا قاتىنايتىن اۋە كەمەسى بورتىندا قۇقىق بۇزۋشى بار ەكەندىگى تۋرالى حابارلاما تۇسكەن. كولىك پوليتسياسىنىڭ تەكسەرۋى بارىسىندا اۋە كەمەسىنىڭ بورتىندا قاراعاندى قالاسىنىڭ 32 جاستاعى ازاماتشاسىنىڭ تەمەكى شەككەنى انىقتالدى. ول وسى ارەكەتى ارقىلى ۇشۋ قاۋىپسىزدىگى ەرەجەسىن بۇزعان. اۋە كەمەسى كومانديرىنىڭ اكتىسىمەن ول رەيستەن ءتۇسىرىلدى»، - دەلىنگەن كولىكتەگى پوليتسيا دەپارتامەنتىنىڭ حابارلاماسىندا.
ءدال وسىنداي تاعى ءبىر وقيعا دا الماتى اۋەجايىندا تىركەلگەن. وندا دا «ەير استانا» اۋە كومپانياسىنىڭ ۇشاعىندا تەمەكى شەككەن شەتەلدىك ازامات جازاعا تارتىلعان.
«قۇقىق بۇزۋشى وزبەكستان رەسپۋبليكاسىنىڭ 39 جاستاعى ازاماتى بولىپ شىقتى. ول «ىستانبۇل-الماتى-تاشكەنت» باعىتىنداعى اۋە كەمەسىنىڭ بورتىندا تەمەكى شەككەن. اۋە كەمەسى كومانديرىنىڭ اكتىسىمەن ول رەيستەن ءتۇسىرىلدى. بۇل فاكتىلەر بويىنشا كولىك پوليتسياسىنىڭ قىزمەتكەرلەرى اكىمشىلىك حاتتاما تولتىرىپ، اتالعان قۇقىق بۇزۋشىلاردى ق ر اكىمشىلىك قۇقىق بۇزۋشىلىق تۋرالى كودەكسىنىڭ 564-بابى 5-تارماعى بويىنشا اكىمشىلىك جاۋاپكەرشىلىككە تارتۋ ءۇشىن ونى ق ر ي ي د م ازاماتتىق اۆياتسيا كوميتەتىنە جىبەردى»، - دەدى دەپارتامەنتتەن.
ايتا كەتەيىك، ق ر اكىمشىلىك قۇقىق بۇزۋشىلىق تۋرالى كودەكسىنىڭ اتالعان بابىنا سايكەس كىنالى تۇلعا 200 ا ە ك كولەمىندە ايىپپۇل تولەيدى نەمەسە 15 تاۋلىككە اكىمشىلىك قاماۋعا الىنادى.
