اڭشىلاردىڭ قولىنان قازا تاپقان قورىقشىنىڭ ءىسى قايتا تەرگەلۋى مۇمكىن
بۇگىن ىشكى ىستەر مينيسترىنە شاعىمدانعان جابىرلەنۋشىلەردىڭ وكىلى تەرگەۋدىڭ ادىلەتسىز ءوتىپ جاتقانىن ايتتى دەپ حابارلايدى «ك ت ك» ارناسى.
«قىلمىس ورنىنا پوليتسيانىڭ شۇعىل تەرگەۋ توبى ءبىر تاۋلىك وتكەن سوڭ عانا كەلگەن. ولاردىڭ تىم كەش جەتۋىنىڭ سەبەبىن ەشكىم تۇسىندىرگەن جوق. ونىڭ ۇستىنە ۇستالعان 7 ادامنىڭ ۇشەۋى عانا كۇدىكتى دەپ تانىلعان. بۇل قالاي؟ ولاردىڭ بارلىعى ۇيىمداسقان قىلمىستىق توپ ەمەس پە؟»، - دەيدى جابىرلەنۋشى تاراپتىڭ وكىلى عالىمجان تاۋەكەلوۆ.
قولعا تۇسكەندەردى «قىزىلوردالىق باندا» دەپ اتاعان ادۆوكات ولاردىڭ بارلىعى قىلمىسكەر ەكەنىن ايتادى.
قازىر بەرىك احمەتوۆ، نۇرلان شۇكىلدىكوۆ، قايرات اقشانوۆ ەسىمدى ءۇش ازامات قانا كۇدىكتى دەپ تانىلعان ەكەن.
ەكىنشى كولىكتە بولعان قالعان ءتورت ادامدى دا سولاردىڭ قاتارىنا قوسۋ كەرەك دەگەن ول ءىستىڭ ءادىل تەرگەلىپ جاتقانىنا كۇمان كەلتىرىپ وتىر.
«ورتالىق اپپاراتتا 17 تەرگەۋشى بار. ولاردىڭ ەكەۋىن ەرتەڭ قاراعاندىعا جىبەرەمىن. ولار ءسىز ايتقان ماسەلەلەردىڭ بارلىعىن تەكسەرىپ، جەرگىلىكتى تەرگەۋشىلەردىڭ جۇمىسىنا باعا بەرۋى ءتيىس. ءارى قىلمىس ورنىنا شۇعىل تەرگەۋ توبىنىڭ نەلىكتەن كەش جەتكەنى دە انىقتالادى. نەگىزى ولار اۋا رايى ناشار بولسا دا، تىكۇشاقپەن بىردەن جەتۋى كەرەك بولعان»، - دەدى ىشكى ىستەر ءمينيسترى ەرلان تۇرعىمبايەۆ.
