الماتى وبلىسىندا اۋىل تۇرعىندارى اۋىز سۋدىڭ تارتىلۋىنا قارسى
سەبەبى تۇرعىندار ءار ۇيدە اۋىز سۋ سارقىراپ اعىپ جاتقانىن ايتادى، دەپ حابارلايدى قازاقپارات ءتىلشىسى.
ال اكىمدىكتەگىلەر 28 ءۇيى بار اۋىلعا اۋىز سۋ تارتۋ ءۇشىن 30 ميلليون تەڭگە اقشا ءبولىپ، جۇمىستارىن باستاپ كەتىپتى.
«ءبىز اۋداننان، اۋدان اكىمىنەن ەشكىمنەن سۋ سۇراعان ەمەسپىز. ءبىزدىڭ قازىرگى ءىشىپ جاتقان سۋىمىز تاپ-تازا. ءومىرى سول سۋدى ءىشىپ كەلەمىز. اۋىلدا بار جوعى 25 ءتۇتىن بار، ءارقايىسىنىڭ ەسىگىنىڭ الدىنان اعىپ تۇرعان سۋدى جاۋىپ، اناۋ ايدالادان قازىپ، بىزگە سۋ شىعارىپ بەرەمىز دەيدى. 25 ءۇي. قانشا سۋ ىشەدى. باشنيا قويادى. باشنياداعى سۋ ساسيدى. بورسيدى. ەل اۋرۋ بولادى. ەرتەڭ وعان كىم جاۋاپ بەرەدى»، - دەدى شولاقوزەك اۋىلىنىڭ تۇرعىنى مۇحيت بايمۇحانبەتوۆ.
قازىر 300 مەتر تەرەڭدىكتەن شىعىپ جاتقان سۋعا حالىق اقشا تولەپ جاتقان جوقپىز دەيدى. ال جاڭادان اۋىز سۋ تارتىلعاندا ءار ۇيگە ەسەپتەگىش قۇرال ورناتىلىپ، سۋدىڭ اقىلى بولاتىنىن اۋىل اكىمى راستادى. قازىر ءجۇرىپ جاتقان اۋىز سۋدىڭ جۇمىستارى قاراشا ايىندا اياقتالادى دەپ جوسپارلانۋدا.
«شولاقوزەك اۋىلىنا اۋىز سۋ تارتۋ ءۇشىن 30 ميلليون تەڭگە قاراستىرىلعان. بۇل اۋىلدا اۋىز سۋ 70 -جىلدارى سالىنعان، بۇگىنگى كۇنى توزىعى جەتىپ، كۇردەلى جوندەۋگە جارامايدى»، - دەدى اقسۋ اۋىلدىق وكرۋگىنىڭ اكىمى نۇرقۋات كاكىمبايەۆ.
اقسۋ اۋىلدىق وكرۋگىنە قاراستى شولاقوزەك حالقىنىڭ 30 ميلليون تەڭگە دالاعا ۇشقانمەن تەڭ بولادى دەپ جاتقاندارى بەكەر ەمەس ەكەن. سەبەبى ىرگەسىندەگى كوكجايداق اۋىلىنا 2005 -جىلى اۋىز سۋعا اقشا ءبولىنىپ، راحاتىن حالىق كورمەدىك دەيدى.
