ديسنەيدىڭ ءبىر فيلمىن قازاق تىلىنە دۋبلياجداۋ قانشا تۇرادى
بۇل سۇراققا «بولاشاق» كورپوراتيۆتى قورىنىڭ ديرەكتورى دينارا ءشايجۇنىسوۆا جاۋاپ بەردى، دەپ حابارلايدى قازاقپارات ءتىلشىسى.
«ورتا ەسەپپەن ءبىر فيلمنىڭ دۋبلياجىنا 100-150 مىڭ ا ق ش دوللارى (37-55 ميلليون تەڭگە ارالىعىندا) كەتەدى. دۋبلياجداۋ جۇمىسى بىرنەشە كەزەڭنەن تۇرادى. بىرىنشىدەن، فيلمدى جانە ستۋديانى تاڭداپ الۋ كەرەك بولسا، ەكىنشىدەن جەتپىسكە تارتا ادامنان قۇرالعان شىعارماشىلىق توپ قۇرىلادى. سەبەبى، نەگىزگى رولدەردىڭ كاستينگىن ديسنەي كومپانياسى بەلگىلەيدى. بارلىق ءماتىن اۋدارىلىپ، داۋىستار جازىلىپ، بارلىق نەگىزگى رولدەر بەكىتىلگەن سوڭ لوندونداعى ستۋديادا جۇمىس باستالادى. ياعني، كومپانيانىڭ بارلىق ەلدەرگە قوياتىن تالاپتارى بويىنشا فينالدىق تەكسەرۋ جۇرگىزىلەدى. كومپانيا بۇل ماسەلەلەردى قاتاڭ باقىلاۋىنا الىپ، باسقا ستۋديادا ءتارجىمالانباۋىن قاداعالايدى. سودان كەيىن بارىپ فيلم قايتادان قازاقستانعا جولدانادى»، - دەيدى دينارا ءشايجۇنىسوۆا.
«بولاشاق» ك ق ديرەكتورىنىڭ ايتۋىنشا، دۋبلياج جۇمىسى تاپ باسىپ حالىققا ۇسىنىلا سالاتىن قاراپايىم شارۋا ەمەس. پروكاتقا شىعار الدىنداعى جارناما جۇمىستارى دا ءبىرشاما شارۋانى تالاپ ەتەدى.
«قازىرگى تاڭدا ءبىر وكىنىشتىسى، قازاق تىلىندەگى مۇنداي فيلمدەرگە سۇرانىس ازداۋ. الايدا، بۇل جوبانىڭ يدەولوگيالىق سيپاتى بارىن ەسكەرۋ كەرەك. كوپ ادامدا شەت تىلدەگى فيلمدەردى ورىس تىلىندە كورۋ كەرەك دەگەن قاساڭ قاعيدا قالىپتاسىپ قالعان. سول سەبەپتى، بۇل رەتتە مادەني ەرەكشەلىكتى ەسكەرە وتىرىپ، مەنتاليتەتپەن جۇمىس ىستەۋ كەرەك. ءبىراق، مەن الداعى ۋاقىتتا قازاق تىلىندەگى فيلمدەرگە سۇرانىس ارتاتىنىنا سەنەمىن. سەبەبى، ءۇش بالانىڭ اناسى رەتىندە بۇلدىرشىندەرىمنىڭ شەتەل فيلمدەرىن انا تىلىندە تاماشالاعانىن قالايمىن»، - دەيدى دينارا ءشايجۇنىسوۆا.
ەسكە سالا كەتسەك، «بولاشاق» كورپوراتيۆتىك قورى بۇگىن «وزىڭنەن باستا» جوباسى اياسىندا قازاق تىلىنە دۋبلياجدالعان Disney كومپانياسىنىڭ 5 جاڭا فيلمىنىڭ تۇساۋكەسەرىن وتكىزدى. قور ديرەكتورى دينارا ءشايجۇنىسوۆانىڭ ايتۋىنشا، وسى جىلى كىشكەنتاي كورەرمەندەر نازارىنا قازاق تىلىنە اۋدارىلعان 5 فيلمنىڭ تۇساۋكەسەرى دايىندالۋدا. اتاپ ايتقاندا، 28 -ناۋرىزدا - «دامبو»، 12 -مامىردا - «الاددين»، 20 -ماۋسىمدا - «ويىنشىقتار حيكاياسى 4»، 19 -شىلدەدە - «ارىستان پاتشا» جانە 28 -قاراشادا - «مۇزدى ولكە 2» تۋىندىلارى كورەرمەنگە جول تارتادى.
