قازاقستاندا شاحمات مەكتەپ باعدارلاماسىنا ەنگىزىلە مە؟
«مەن بۇرىنعى ءبىلىم مينيسترىمەن كەزدەسكەن ەدىم. ەندى، جاڭا مينيستر كۇلاش نوعاتاي قىزىمەن كەزدەسەتىن جوسپارىمىز بار. نەگىزى، 2016 -جىلدان بەرى ءبىز استانانىڭ حالىقارالىق مەكتەبى اياسىندا بالالارمەن جۇمىس ىستەپ كەلەمىز. شامامەن، 600 بالا اينالىسادى. اتالعان مەكتەپ نازاربايەۆ زياتكەرلىك مەكەپتەرىنىڭ قۇرامىنا كىرەدى. سول كەزدە كۇلاش نوعاتاي قىزى شاحماتتى دامىتۋ شارالارىنا ۇنەمى قولداۋ جاساپ وتىردى. وسى ايدا قازاقستاننىڭ شاحمات فەدەراتسياسى مەن مينيسترلىك باسشىلىعى ارنايى كەزدەسۋدى جوسپارلاپ وتىر. سول جەردە مەكتەپتەردە شاحمات ويىندارىن دامىتۋ ماسەلەسىن تالقىلايتىن بولامىز» ، - دەدى د. ءسادۋاقاسوۆ جۋرناليستەرگە بەرگەن سۇحباتىندا.
ونىڭ ايتۋىنشا، وسىدان ون جىل بۇرىن ارمەنيا مەكتەپتەرىندە شاحمات مىندەتتى ءپان رەتىندە ەنگىزىلگەن بولاتىن. سونىڭ ناتيجەسىندە وسى ەلدىڭ ەرلەر قۇراماسى شاحماتتان دۇنيەجۇزىلىك وليمپيادادا ءۇش رەت چەمپيون اتاندى.
«ءيا، ءبىرىنشى رەت كادىمگىدەي سەنساتسيا بولدى. ەكىنشى رەت ساتتىلىك سەرىك بولعان شىعار. ال ءۇشىنشى رەت جەڭىسكە جەتكەندە بارلىعى ويلانىپ قالدى. سەبەبى ارمەنيانىڭ قۇراماسى ءۇش رەت جەڭىسكە جەتتى. بۇل - ۇلكەن كورسەتكىش. قازىر رەسەيدىڭ ءبىرقاتار ايماقتارىندا شاحماتتى مەكتەپ باعدارلاماسىنا ەنگىزدى. ەندى، بارلىق فەدەراتسياعا تاراتامىز دەيدى» ، - دەپ اتاپ كورسەتتى د. ءسادۋاقاسوۆ.
ايتا كەتەيىك، بۇعان دەيىن دارمەن ءسادۋاقاسوۆ شاحماتشى ءبيبىسارا اساۋبايەۆانىڭ رەسەيدەن قايتىپ كەلۋىنە قاتىستى ءوز پىكىرىن بىلدىرگەن بولاتىن. «مەن ءوزىم ءبيبىسارانىڭ تالانتىنا ءتانتىمىن. ءالى ەسىمدە، 6 جاسىندا بولعاندا مەن ونى تەستەن وتكىزدىم. سول كەزدە ونىڭ قابىلەتىن كورىپ، اناسىنا بىردەن ايتتىم. ونىڭ بويىندا سيرەك كەزدەسەتىن تالانت، مىقتى تابيعي قابىلەت بار. ول ءبىر نارسەگە زەيىن قويىپ، ۇزاق وتىرا الادى. ونى «زەيىن كونتسەنتراتسياسى» دەيدى. ءدال وسى كونتسەنتراتسيانى ءبيبىسارا ۇزاق ۋاقىت ۇستاپ وتىرا الادى. نەگىزى، ءار ادامنىڭ زەيىن قويۋ قابىلەتى ءارتۇرلى. ال ءبيبىسارا تەست كەزىندە وتە جاقسى ناتيجە كورسەتتى. شاحماتشى ءۇشىن بۇل اسا قاجەتتى قابىلەت، اسا ۇلكەن ارتىقشىلىق» ، - دەيدى د. ءسادۋاقاسوۆ. ونىڭ ايتۋىنشا، قازاقستاندا مىقتى شاحماتشى جىگىتتەر دە بار.
