ەكسپو كەزىندە قازاق جىگىتىنەن قىزدى بولعان كونگولىق ايەل سابيىنەن اجىراپ قالۋى مۇمكىن
وسىعان بايلانىستى ايەلدى جەر اۋدارىپ، ءسابي وسىندا قالۋى مۇمكىن دەپ حابارلايدى ەۋرازيا ءبىرىنشى ارناسى.
مونيكا استاناعا اقشا تابۋ ءۇشىن كەلىپ، بالاسىمەن بوتەن ەلدە جالعىزسىراپ قالعان.
قازىرگى ۋاقىتتا ول بالاسىن باعىپ، قازاق پەن ورىس تىلدەرىن مەڭگەرىپ ءجۇر.
نارەستەنىڭ اكەسى بايلانىسقا ءالى شىقپاپتى. مونيكانىڭ بوسانىپ العانىن اناسى الەۋمەتتىك جەلى ارقىلى بىلگەن.
«انام Facebook جەلىسىندەگى سۋرەتتى كوردى. سوسىن جىلاي باستادى. نەگە وسىلاي بولدى دەيدى. جىلاعاننان اۋىرىپ قالدى. ءبىراق بۇل جەردە ماعان ءبارى جاقسى. انالار ۇيىندە قىزداردى فرانسۋز تىلىنە باۋليمىن»، - دەيدى مونيكا كامۋكەنج.
ول ءوزى مەن قىزىن اسىراۋ ءۇشىن كەز كەلگەن جۇمىستى ىستەۋگە داين ەكەنىن ايتادى.
قازاقستاندىق زاڭگەرلەر بالانىڭ تۋۋ تۋرالى كۋالىگىن تىركەگەن. بولاشاقتا نارەستە قازاقستاندىق ءتولقۇجاتتى الا الادى.
ەسەسىنە ءسابيدىڭ اناسى مونيكانىڭ قۇجاتتارىمەن ۇلكەن ماسەلەلەر پايدا بولعان. وعان بوسقىن مارتەبەسى بەرىلمەگەندىكتەن، ايەل سوت ارقىلى شاعىمدانىپ كورمەك.
مونيكانىڭ ق ر اۋماعىندا ءجۇرۋ قۇجاتىنىڭ مەرزىمى ءبىر ايدان سوڭ اياقتالادى.
«كومەك» ۋاقىتشا ءومىر ءسۇرۋ ورتالىعىنىڭ مالىمدەۋىنشە، مونيكا قىزىمەن بىرگە ەلىمىزدەن شىعا العانىمەن، ونى كونگوعا ارنايى قۇجاتتارسىز كىرگىزبەيدى ەكەن.
«ونى ول ەلدە نە كۇتەدى، قالاي ورالادى؟ ول مەملەكەتتىڭ جاعدايى دا اسا ءماز ەمەس»، - دەپ ۋايىمدادى ورتالىق ديرەكتورى اننا رىل.
سونىمەن قاتار ورتالىق جەتەكشىسى مونيكانىڭ ەلىنە بارىپ قاجەتتى قۇجاتتاردى جيناپ، قايتىپ قازاقستانعا كەلە الا ما، ول جاعىن بىلمەيتىنىن ايتادى.
ال مونيكا قىزىنىڭ ءوز وتانىندا نە بولىپ جاتقانىن ەشقاشان كورمەگەنىن ارماندايتىنىن ايتادى.
«ءوزىم جانە قىزىم ءۇشىن قورىقپاي جاي عانا ءومىر سۇرگىم كەلەدى»، - دەيدى ايەل ادام.
مونيكا كوپ ۇلتتى قازاقستاننىڭ ءبىر بولىگى بولىپ، وسىندا دوستار تاۋىپ، وتباسىن قۇرىپ، قىزىن وسىرۋگە ۇمىتتەنەدى.
