پاتەرگە نەسيەنى قۇرىلىس كەزەڭىندە بەرۋ ۇسىنىلدى

 بۇل تۋرالى اتالعان مينيسترلىكتەگى قۇرىلىس جانە ءتۇرعىن ءۇي- كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى باقىتجان قاشاقوۆ ءمالىم ەتتى، دەپ حابارلايدى قازاقپارات ءتىلشىسى.

«باعدارلامانى اۋقىمدى تۇردە جۇزەگە اسىرۋ ءۇشىن ۇلتتىق بانككە «7-20-25» باعدارلاماسى قاتىسۋشىلارىن نەسيەلەۋدى ۇلەستىك قۇرىلىس كەزەڭىنەن قاراستىرۋدى ۇسىنامىز»، - دەدى ب. قاشاقوۆ سەناتتاعى الەۋمەتتىك تۇرعىن ءۇي ساتىپ الۋ مۇمكىندىكتەرىن كەڭەيتۋگە ارنالعان دوڭگەلەك ۇستەل وتىرىسىندا.

وسى ورايدا كەپىلدىك بەرۋ قورى كەپىلدىگىمەن يپوتەكالىق نەسيەلەۋ تەتىگىن ەنگىزۋ ۇسىنىلۋدا.

«بۇل تەتىك باعدارلاماعا قاتىسۋشىلاردىڭ كوپ بولىگىن قامتۋعا جانە حالىق ءۇشىن باسپانانىڭ قولجەتىمدىگىن ارتتىرۋعا مۇمكىندىك بەرەدى»، - دەدى ول.

بۇدان بۇرىن حابارلانعانداي، 2018 -جىلعى 4 - شىلدەدەن باستاپ ەكىنشى دەڭگەيدەگى بانكتەر حالىققا «7-20-25» باعدارلاماسى بويىنشا يپوتەكالىق تۇرعىن ءۇي قارىزدارىن بەرۋدى باستادى. 2019 -جىلعى 6 - ناۋرىزداعى جاعداي بويىنشا 117,7 ميلليارد تەڭگە سوماسىنا  10321 ءوتىنىم قابىلداندى. ونىڭ ىشىندە بانكتەر 70 ميلليارد تەڭگە سوماسىنا  5983 ءوتىنىمدى ماقۇلدادى. قازىرگى ۋاقىتتا باعدارلاماعا ەلدىڭ بارلىق وڭىرلەرىن قامتيتىن ەكىنشى دەڭگەيدەگى 8 ءىرى بانك قاتىسۋدا.

جالپى، «7-20-25» باعدارلاماسى بويىنشا 2019 -جىلعا قاجەتتىلىك 16 مىڭعا جۋىق پاتەردى قۇرادى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى