قازاقستان شەكاراسىندا بىرنەشە زاڭسىز ارەكەتتىڭ جولى كەسىلدى
باسپا ءسوز مالىمەتتەرىنە قاراعاندا، اقتوبە شەكارا وتريادىنىڭ «الىمبەت-اۆتو» وتكىزۋ بەكەتىندە شەكاراشىلار ەشقانداي رۇقسات قاعازدارىنسىز 10 توننا مەتال سىنىقتارىن «ماز» اۆتوكولىگىمەن رەسەيگە الىپ وتپەك بولعان 1984-جىلى تۋعان رەسەي ازاماتىن ۇستادى. ۇستالعان ازامات جۇگىمەن بىرگە اقتوبە وبلىسى بويىنشا مەملەكەتتىك كىرىس دەپارتامەنتىنە تاپسىرىلدى.
سونداي-اق قوستاناي شەكارا وتريادىنىڭ «قايراق-اۆتو» بولىمشەسىندە شەكارا ناريادى ەلىمىزدەن رەسەيگە كەتىپ بارا جاتقان 26 جاستاعى قازاقستاندىقتىڭ جەكەمەنشىك «جاك» اۆتوكولىگىنەن قىزىل كىتاپقا ەنگىزىلگەن جانۋار - ارقاردىڭ باسىن تاۋىپ الدى. ۇستالعان ازامات ايعاق زاتىمەن بىرگە قارابالىق اۋداندىق پوليتسيا بولىمىنە تاپسىرىلدى.
قورداي شەكارا وتريادىنىڭ «قاراسۋ» وتكىزۋ پۋنكتىندە كەشكى ساعات 19:00 دەر شاماسىندا ەكى بىردەي «مەرسەدەنس-بەنس» جۇك كولىگىنىڭ ءارقايسىسىنان 2000 كيلوگرامنان جانە «حوندا وديسسەي» جۇك كولگىنەن 500 كەلى ەشقانداي رۇقسات قاعازدارىنسىز (جيىنى 4500 كەلى) حالىق تۇتىناتىن تاۋارلار تابىلدى. ولاردى قازاقستانعا قاراي الىپ كىرمەك بولعان 38-34 جاستاعى ەكى قازاقستاندىق جانە 38 جاستاعى قىرعىز رەسپۋبليكاسىنىڭ ازاماتى ۇستالدى. تاۋارلار مەن كولىكتەر تاركلەنىپ قورداي اۋداندىق مەملەكەتتىك كىرىس دەپارتامەنتىنە تاپسىرىلدى.
وسى وتريادتىڭ «قورداي-اۆتو» وتكىزۋ پۋنكىتىندە تۇنگى ساعات 1:00 دەر شاماسىندا جەكەمەنشىك «نيسسان تيانا» اۆتوكولىگىمەن قىرعىز رەسپۋبليكاسىنان ەلىمىزگە قاراي، جالپى سالماعى 468 كەلى كاليانعا ارنالعان تەمەكى ءونىمىن زاڭسىز الىپ كىرمەكشى بولعان قىرعىز رەسپۋبليكاسىنىڭ ازاماتى ۇستالدى. اۆتوكولىگى جۇگىمەن بىرگە تاركىلەنىپ، قورداي اۋداندىق مەملەكەتتىك كىرىس دەپارتامەنتىنە تاپسىرىلدى.
«سونىمەن قاتار، تاڭعى ساعات 5:00 دەر شاماسىندا 200 ليترگە جۋىق جانارمايدى «مەرسەدەس-بەنس» اۆتوكولىگىمەن ەلىمىزدەن زاڭسىز الىپ شىقپاقشى بولعان 30 جاستاعى قىرعىز رەسپۋبليكاسىنىڭ ازاماتى ۇستالدى»، - دەلىنگەن حابارلامادا.
