دۇنيەجۇزىلىك دەنساۋلىق ساقتاۋ ۇيىمى تۇماۋعا قارسى جاڭا ستراتەگيا ازىرلەدى
دۇنيەجۇزىلىك دەنساۋلىق ساقتاۋ ۇيىمى (د د ۇ) تۇماۋدى جاھاندىق اۋقىمداعى قاۋىپتى ىندەتتەردىڭ ءبىرى دەپ اتاپ، قاۋىپتى ۆيرۋستى ەمدەيتىن جانە الدىن الاتىن جاڭا ستراتەگيانى ۇسىندى. ول 2030-جىلعا دەيىنگى كەزەڭگە ەسەپتەلگەن، دەپ حابارلايدى قازاقپارات ب ۇ ۇ سايتىنا سىلتەمە جاساپ.
د د ۇ باس ديرەكتورى تەدروس ادحانوم گەبرەيەسۋس تۇماۋ پاندەمياسىنىڭ بۇگىنگى احۋالىنا قاتىستى پىكىر ءبىلدىردى.
«تۇماۋ پاندەمياسى قاۋپى ۇنەمى بولادى»، - دەپ مالىمدەدى د د ۇ باسشىسى. سونداي-اق، ول تۇماۋ ۆيرۋسىنىڭ جانۋارلاردان ادامدارعا بەرىلۋ قاۋپى بارىن دا اتاپ ءوتتى.
جىل سايىن تۇماۋدان 290-650 مىڭ ادام قازا تاۋىپ جاتىر. جاھاندانۋ، ۋربانيزاتسيا جانە تۇرعىنداردىڭ جاپپاي قونىستانۋى كەلەسى پاندەميانىڭ الدەقايدا تەز تارالۋىنا اكەلىپ سوقتىرۋى مۇمكىن.
11 جىلدىق ستراتەگيا ءتيىمدى ۇلتتىق باعدارلامالاردى ازىرلەۋدى جانە ءۇش ماقساتقا: ماۋسىمدىق تۇماۋدىڭ سانىن ازايتۋدى، ۆيرۋستىڭ جانۋارلاردان ادامدارعا بەرىلۋ قاۋپىن بارىنشا ازايتۋدى جانە ىقتيمال پاندەميانىڭ سالدارىن جۇمسارتۋدى كوزدەيدى.
د د ۇ 2002-جىلى ماداگاسكارداعى تۇماۋ ۆيرۋسىن ەسكە سالدى. ول كەزدە اۋىرعانداردىڭ 2,5 پروتسەنتى كوز جۇمعان. بۇعان دەيىن مۇنداي تۇماۋ پاندەمياسى 1918-1919-جىلدارى بولعان.
جاڭا ستراتەگيانى جۇزەگە اسىرۋ ءۇشىن جىل سايىن 4,5 ميلليارد دوللار قارجى كەرەك. ۇيىم ساراپشىلارى ۆاكسينالاۋدىڭ تۇماۋعا قارسى ەڭ ءتيىمدى قۇرال ەكەنىن ەسكە سالدى.
