تۇلعالىق قاسيەتىن بارىنشا اشىپ كورسەتۋگە تىرىستىق - رەجيسسەر «بالۋان شولاق» فيلمى جايلى

كورەرمەن كوپتەن كۇتكەن فيلم بالۋان ءومىرىنىڭ قاي كەزەڭىن قامتيدى؟ ءتۇسىرىلىم بارىسىندا قانداي قيىندىقتار كەزدەستى؟ بۇل تۋرالى قازاقپارات تىلشىسىنە فيلم رەجيسسەرى نۇرگەلدى سادىعۇلوۆ ايتىپ بەردى.

«بالۋان شولاق» فيلمى 11- ساۋىردە جالپى ۇلتتىق پروكاتقا شىعادى. كينو ءتۇسىرىلىمى بارىسىندا گرافيكا جاعىنان قينالدىق. سەبەبى، اكتەر ەركەبۇلان دايىروۆتىڭ ساۋساقتارىن «كەسۋ» كەرەك بولدى. ءار كادردا تۇتاس ساۋساقتارى كورىنىپ قالعاننان كەيىن بالۋان شولاققا ۇقساتۋ ءۇشىن ءاربىر كادر بويىنشا جەكە گرافيكالىق جۇمىس اتقارۋعا تۋرا كەلدى. فيلم 2017-جىلى تۇسىرىلە باستادى. ءسويتىپ، سول جىلدىڭ كۇزىندە مونتاجعا كىرىسىپ كەتتىك. وتكەن جىلى مونتاج اياقتالعاننان كەيىن ءدال وسى گرافيكالىق جۇمىستار ءبىرشاما ۋاقىتىمىزدى الدى»، - دەيدى نۇرگەلدى سادىعۇلوۆ.

رەجيسسەردىڭ ايتۋىنا قاراعاندا، بالۋان شولاقتىڭ ءرولىن سومداعان اكتەر ەركەبۇلان دايىروۆ 10-15 كەلى سالماق قوسقان. بالۋاننىڭ تۇلعاسىنا بارىنشا ۇقساۋ ءۇشىن اكتەر كۇرەس ۇيىرمەسىنە بارىپ، تاماقتانۋ رەجيمىن قاتاڭ ساقتاپتى.

«ەركەبۇلان دايىروۆ اتقا جاقسى مىنەتىندىكتەن، ول جاعىنان قيىندىق تۋعان جوق»، - دەيدى ول.

نۇرگەلدى سادىعۇلوۆتىڭ سوزىنە قۇلاق اسساق، فيلم بالۋان بابانىڭ ومىرىندەگى ءبىر عانا ەپيزودىن قامتيدى.

«بالۋان شولاق ءومىرىنىڭ ەڭ ماڭىزدى كەزەڭىن، ياعني ءسابيت مۇقانوۆ جازىپ قالدىرعان، مۇحتار اۋەزوۆ تەاترىندا قويىلىپ جۇرگەن «جاۋجۇرەك» پەساسىندا كورسەتىلەتىن وقيعالاردى بارىنشا قامتۋعا تىرىستىق. ول - جەر داۋىنا بايلانىستى ەپيزود. تاريحتا پەرەسەلەندەردى (قونىس اۋدارۋشىلاردى) ورنالاستىرىپ، قازاقتاردى ءوز جەرىنەن قۋعان كەزەڭ بولعانى بەلگىلى. فيلمدى دە سوعان بايلانىستى بەيىمدەدىك. بالۋان شولاقتى بۇل رەتتە جاي بالۋان نەمەسە سازگەر، ءانشى رەتىندە عانا ەمەس، تۇلعا رەتىندە، ەلگە، جەرگە دەگەن ماحابباتىن كورسەتۋگە تىرىستىق. دۋلات يسابەكوۆتىڭ پەساسىندا ونىڭ ءبارى قامتىلعان. بالۋان شولاقتىڭ جەر داۋى كەزىندە «مەن بۇلاي كۇلىپ-ويناپ جۇرە المايدى ەكەم» دەيتىنى بار. سول كورىنىستەر فيلمگە ەندى»، - دەيدى رەجيسسەر.

نۇرگەلدى سادىعۇلوۆ وسى اپتادان باستاپ تۋىندى تۋرالى جارنامالىق اكسيا باستالاتىنىن جاريا ەتتى. فيلمنىڭ تۇساۋكەسەرى الماتى مەن استانا قالاسىندا ءبىر-ەكى كۇن ەرتەرەك وتكەنىمەن، 11- ساۋىردەن باستاپ بۇكىل رەسپۋبليكا كينوتەاترلارىندا كورسەتىلە باستايدى.

ەسكە سالا كەتسەك، 2017-جىلى ش. ايمانوۆ اتىنداعى «قازاق فيلم» كينوستۋدياسى مادەنيەت جانە سپورت مينيسترلىگىنىڭ تاپسىرىسى بويىنشا دۋلات يسابەكوۆتىڭ ستسەناريى نەگىزىندە بالۋان شولاق تۋرالى تولىق مەتراجدى كوركەم فيلم تۇسىرە باستاعان بولاتىن. كينوسەناري م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا ساحنالانعان «جاۋجۇرەك» پەساسىنىڭ جەلىسى بويىنشا جازىلعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى