ەلىمىزدەگى اسكەري بولىمشەلەردىڭ الەۋەتى قانداي؟
ءسويتىپ ون ەكى مۇشەسى ساۋ بولماسا دا، سول جاستار وتان الدىنداعى بورىشىن وتەۋگە اتتانادى. بۇگىن ەلوردانىڭ ىرگەسىندەگى اسكەري بولىمگە بارعان دەپۋتاتتار وسىنداي دەرەكپەن ءبولىستى. بۇگىن ءماجىلىستىڭ ءبىر توپ دەپۋتاتى ۇلتتىق ۇلاننىڭ جەدەل ماقساتتاعى استانالىق بريگاداسىنا باردى.
حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەلەرى 5573 اسكەري ءبولىمىن تولىقتاي ارالاپ شىقتى. ماتەريالدىق- تەحنيكالىق الەۋەتىن باعامدادى. 5573 اسكەري ءبولىمىنىڭ ساربازدارى قالانىڭ قاۋىپسىزدىگى مەن قوعامدىق تارتىپكە جاۋاپتى. نە كەرەك، ساربازدار ساقاداي ساي.
يتتەر دە ابدەن دايىندالعان. كەز كەلگەن قاۋىپتىڭ بەتىن قايتارا الادى. ارنايى وپەراتسيالارعا ماشىقتانعان. ءىز كەسەتىن ءيىسشىل يتتەر قاۋىپتى زاتتى ياكي ەسىرتكىنى ساناۋلى سەكۋندتا تاۋىپ بەرەدى. قاۋىپسىزدىكتى قامتاماسىز ەتۋگە جاۋاپتى بولىمدە بارلىق جاعداي جاسالعان. تەحنيكالاردىڭ دا ءتۇر- ءتۇرى تۇر. قارۋ- جاراقتارى سايلانعان.
اسكەري ءومىرىن ەسكە تۇسىرگىسى كەلدى مە، دەپۋتات باقىتجان ەرتايەۆ ورتا جولدا كەنەتتەن توقتاپ، ءبىر اۆتوماتتى قولىنا الىپ كوردى. ۇلتتىق ۇلان ساربازدارىنىڭ اسكەري كيىمدەرى دە تۇرلەنگەن. ءار مەزگىل مەن ءتۇرلى وپەراتسيالاردا كيەتىن فورمالارى جاڭارتىلىپتى.
ەرجان ايتۋعانوۆ، ق ر ۇلتتىق ۇلانىنىڭ 5573 اسكەري ءبولىمىنىڭ وفيتسەرى:
- بۇل فورما - كۇندەلىكتى ءبىزدىڭ كيەتىن فورمامىز. باستاعى كۇرەڭ بەرەت. بۇل ارنايى ماقساتتاعى بولىنىستەردىڭ نىشانى بولىپ سانالادى. فورمانىڭ اتاۋى - سارى ارقا. انتيتەررورلىق وپەراتسيا كەزىندە كيەمىز.
دەپۋتتار مەن ۇلتتىق ۇلاننىڭ باسشىلىعى اسكەري ءبولىمدى ارالاپ بولعان سوڭ، ارنايى جيىن وتكىزىپ، سالاداعى وتكىر ماسەلەلەردى تالقىلادى. مىنا بولىمگە قاتىسى بولماسا دا، اتاپ وتەيىك. جالپى اسكەردە جۇرگەن جىگىتتەردىڭ بارلىعى بىردەي ءمىنسىز ەمەس. ارالارىندا ۇيلەرىنەن سىرقاتپەن كەلگەندەرى دە بار. ياعني قورعانىس باسقارماسىنداعى مەديتسينالىق كوميسسيا وكىلدەرى الدارىنا كەلگەن بولاشاق ساربازداردى ءجىتى تەكسەرە بەرمەيدى.
اباي تاسبولاتوۆ، ق ر پارلامەنت ءماجىلىسىنىڭ دەپۋتاتى:
- بۇل اسكەري بولىمدەردىڭ باسشىلىعىنا بايلانىستى ەمەس. جاس جىگىتتەردى اسكەرگە ىرىكتەپ جىبەرۋگە ەڭ الدىمەن جەرگىلىكتى اتقارۋشى ورگان وكىلدەرى جاۋاپتى. اۋدان، وبلىس ورتالىقتارىنداعى مەديتسينالىق كوميسسيا مۇشەلەرى الدىنا كەلگەن ازاماتتاردى ءجىتى تەكسەرە بەرمەيدى. كەيىن اسكەري بولىمدەرگە كەلگەندە، كەيبىر ساربازداردىڭ دەنساۋلىعى سىر بەرىپ، سىرقاتتارى ءبىلىنىپ جاتادى. بۇل ماسەلەنى الداعى ۋاقىتتا ءماجىلىس قابىرعاسىندا كوتەرىپ، تالقىلايتىن بولامىز.
جالپى بۇگىنگى تاڭدا ۇلتتىق ۇلاننىڭ ماتەريالدىق- تەحنيكالىق ءھام الەۋمەتتىك جاعدايى اجەپتاۋىر جاقسارعان. كەلىسىمشارتپەن جۇمىس ىستەيتىن اسكەري قىزمەتشىلەر وسىدان 5 جىل بۇرىن ءۇيسىز جۇرسە، قازىر باسپانالى بولىپ جاتىر. ۇلتتىق ۇلاننىڭ باس قولباسشىسى مالىمدەگەندەي، الداعى ۋاقىتتا اسكەريلەر تەك قىزمەتتىك ەمەس، جەكە پاتەرلەرگە دە يە بولۋى بەك مۇمكىن. بۇل باعىتتا قازىر ءتيىستى جۇمىستار اتقارىلىپ جاتىر.
www.24.kz
