قازاقستان تۋريستىك دەرجاۆالاردىڭ قاتارىنا كىرۋگە ۇمتىلماق
بۇل تۋرالى بۇگىن ۇكىمەت وتىرىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ايتتى، دەپ حابارلايدى قازاقپارات ءتىلشىسى.
وتىرىستا قازاقستان رەسپۋبليكاسىنىڭ تۋريستىك سالاسىن دامىتۋدىڭ 2019-2025-جىلدارعا ارنالعان مەملەكەتتىك باعدارلاماسى جوباسىن تانىستىرعان ءمينيستردىڭ ايتۋىنشا، قۇجات ا ق ش، كانادا، فرانسيا، يسپانيا، تۇركيا، اراب امىرلىكتەرى سىندى 10 تۋريستىك دەرجاۆاعا كىرۋگە مۇمكىندىك بەرەتىن 10 ستراتەگيالىق شارانى قامتيدى.
«ولاردىڭ تولىق جۇزەگە اسىرىلۋى وراسان زور الەۋمەتتىك-ەكونوميكالىق ناتيجە بەرەدى. اتاپ ايتقاندا، جۇمىسپەن قامتىلعاندار سانى 427 مىڭنان 650 مىڭ ادامعا دەيىن ارتادى، ونىڭ شامامەن 72 مىڭى - شالعايداعى اۋىلدىق جەرلەردە تۇراقتى جۇمىس ورىندارى. بۇل مەملەكەت باسشىسىنىڭ «نۇر وتان» پارتياسىنىڭ XVIII سەزىندە بەرگەن تاپسىرماسىنا تولىق سايكەس كەلەدى. مۇندا قازاقستاننىڭ بارلىق حالقىنىڭ شامامەن 40 پايىزى 7,5 ميلليون ادام تۇرادى»، - دەدى ول.
ءمينيستردىڭ دەرەگىنشە، جوبا جۇزەگە اسىرىلعاننان كەيىن ەل ەكونوميكاسىنا 2 مىڭ دوللاردان قالدىراتىن شەتەلدىك تۋريستەردىڭ سانى 5 ميلليون، ال ىشكى تۋريستەردىڭ سانى 10 ميلليوندى قۇرايدى. جوسپارلانعان 2 تريلليون تەڭگەنىڭ 70 پايىزىن جەكە ينۆەستيتسيالار سالادى. ەلدىڭ ج ءى و قۇرىلىمىنداعى تۋريزمنىڭ ۇلەسى 9,6 ميلليارد ا ق ش دوللارىنان 16 ميلليارد ا ق ش دوللارىنا دەيىن وسەدى.
«مەملەكەتتىك باعدارلاما ەلدىڭ تۋريستىك سالاسىنا مەملەكەتتىك بيۋجەتتەن تاۋەلدىلىكتىڭ تولىق اۋىتقۋىن قامتاماسىز ەتەدى جانە بيزنەس پەن ينۆەستورلاردىڭ بەلسەندى قاتىسۋى ەسەبىنەن سالانى ءوزىن-ءوزى اقتايتىن رەلستەرگە شىعارادى. ناتيجەسىندە قازاقستان ساياحات ءۇشىن تارتىمدى 50 ەلدىڭ قاتارىنا كىرەدى»، - دەدى مينيستر.
