سىرتقى ىستەر مينيسترلىگى قىتايدا ۇستالعان قازاقستاندىق قىزعا بايلانىستى مالىمدەمە جاسادى
ادۆوكات قاماۋعا الىنعان قازاقستاندىق ارۋمەن 11- ناۋرىز كۇنى كەزدەسكەن.
«27- اقپان كۇنى قىتاي رسەپۋبليكاسىنىڭ قۇقىق قورعاۋ ورگاندارى يۋليا حوديەۆانى ەسىرتكى زاتتارىن ساقتاۋ جانە تاراتۋمەن اينالىستى دەگەن كۇدىكپەن قاماۋعا الدى. ال 28- اقپان كۇنى ءبىزدىڭ ەلشى ونىمەن تەلەفون ارقىلى سويلەستى. العاشقى كۇننەن-اق بۇل ماسەلە شاڭحاي كونسۋلدىعىنىڭ ەرەكشە باقىلاۋىندا.
بويجەتكەننىڭ اتا-اناسىمەن شۇعىل تۇردە بايلانىس ورناتىلىپ، ولارعا يۋليانىڭ نەلىكتەن قاماۋعا الىنعانى جانە نە ىستەۋ كەرەكتىگى ءتۇسىندىرىلدى»، - دەيدى قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ.
ونىڭ مالىمەتىنشە، ادۆوكات - قىتاي ازاماتى. ونى بويجەتكەننىڭ اتا-اناسى جالداعان. اپتانىڭ اياعىنا دەيىن ەلشىمەن جەكە كەزدەسۋ جانە ۋاقىتشا ۇستاۋ يزولياتورىنا قامالعان ارۋمەن كەزدەسۋ جوسپارلانعان.
«قىزدىڭ اتا-اناسى قازىر قازاقستاندا. تەرگەۋدىڭ ءمان-جايىمەن بولىسە المايمىن. ويتكەنى، تەرگەۋ ءالى جالعاسىپ جاتىر. قىتاي زاڭى بويىنشا، تەرگەۋشى ق ح ر ازاماتى بولۋى ءتيىس. ءبىز تەك ۇستالعان ادامنىڭ جاعدايىن باقىلاپ، قۇقىقتىق كومەك كورسەتەمىز»، - دەدى ول.
سونداي-اق، بويجەتكەنگە تاعىلاتىن ايىپ قانشا مولشەردەگى ەسىرتكى تابىلعانىنا تىكەلەي بايلانىستى بولماق.
«ونىڭ قىتاي اۋماعىندا ءومىر سۇرگەنىنە التىنشى جىل. وقۋىن اياقتاۋىنا بىرنەشە اي قالعان. وكىنىشكە وراي، ول ەلشىلىك تىزىمگە تىركەلمەگەن. ەلشىلىك قىزمەتكەرلەرى بويجەتكەننىڭ قىتايدا وقيتىنىن بىلمەپتى.
شەتەلدەگى بارلىق قازاقستاندىقتاردى ەلشىلىك تىزىمىنە تىركەلۋگە شاقىرامىز»، - دەدى قازاقستاننىڭ سىرتقى ىستەر ۆەدومستۆوسىنىڭ رەسمي وكىلى.
ايتا كەتەيىك، وسىعان دەيىن يۋليا حوديەۆا مەن ەلشىنىڭ تەلەفون ارقىلى سويلەسكەنىن ايتقان بولاتىنبىز. بويجەتكەن دەنساۋلىعى مەن ۋاقىتشا تەرگەۋ يزولياتورىنا شاعىمدانباعان.
