پەتروپاۆلدا اكىمدەرگە ارنالعان بەس كۇندىك سەمينار باستالدى
تالمىش شاراعا قالا جانە 13 اۋداننىڭ اكىمى قاتىستى، دەپ حابارلايدى قازاقپارات ءتىلشىسى.
اكىمدەردى ق ر اۋىل شارۋاشىلىعى ءمينيسترىنىڭ ءبىرىنشى ورىنباسارى، جوبالىق مەنەدجمەنت بويىنشا سەرتيفيكاتتالعان جاتتىقتىرۋشى ارمان ەۆنيەۆ جانە ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ وكىلدەرى وقىتادى.
مامانداردىڭ ايتۋىنشا، سەميناردىڭ ماقساتى - كاسىبي بىلىكتىلىكتى ارتتىرۋ جانە جاڭاشا ويلاۋ داعدىلارىن قالىپتاستىرۋ. جيىندى وبلىس اكىمىنىڭ ورىنباسارى ماديار قوجاحمەت اشتى.
«اۋماقتاردى دامىتۋدا حالىقتىڭ ءال-اۋقاتىن جاقسارتۋ جانە ولاردىڭ ءومىر ساپاسىن ارتتىرۋ ماڭىزدى اسپەكتىلەردىڭ ءبىرى. 2025-جىلعا دەيىنگى ستراتەگيالىق دامۋ جوسپارىنىڭ «قۋاتتى ايماقتار جانە ۋربانيزاتسيا» رەفورماسى - بۇل ءار ايماقتىڭ ەكونوميكالىق تۇرعىدا وزدىگىنەن دامۋىنا باعىتتالعان. سوندىقتان بۇل سەميناردىڭ قاتىسۋشىلارعا بەرەرى مول دەپ ويلايمىن»، - دەيدى ماديار قوجاحمەت.
ارمان ەۆنيەۆ قالا جانە اۋدان اكىمدەرىنە اۋىل شارۋشىلىعى ونىمدەرى مەن ەكسپورت كولەمىن ۇلعايتۋ، مەملەكەتتىك جوبالاردى ءتيىمدى جۇزەگە اسىرۋ سىندى تاقىرىپتاردا ءدارىس وقىپ، ءوز تاجىريبەسىمەن بولىسەدى.
«ەڭ الدىمەن ماقساتتى ايقىنداۋ قاجەت. تاجىريبە كورسەتىپ وتىرعانداي كوپتەگەن مەملەكەتتىك قىزمەتكەرلەر مەن كاسىپكەرلەردە ناقتى العا قويعان ماقسات جوق. ماقسات وزەكتى، شىندىققا نەگىزدەلگەن، قولجەتىمدى جانە ولشەمدى بولۋى كەرەك. ەكىنشىدەن، ءار جاۋاپكەرشىلىكتى دەربەستەۋ قاجەت، ياعني ءار كورسەتكىشكە ناقتى ادام جاۋاپ بەرەدى. ال ءۇشىنشىسى - جۇمىس الگوريتمى»، - دەيدى ق ر اۋىل شارۋاشىلىعى ءمينيسترىنىڭ ءبىرىنشى ورىنباسارى، جوبالىق مەنەدجمەنت بويىنشا سەرتيفيكاتتالعان جاتتىقتىرۋشى ارمان ەۆنيەۆ.
ونىڭ ايتۋىنشا، ۇزاق مەرزىمدى 10 باعدارلاما جاسالعان. ونىڭ تورتەۋى وسىمدىك، تاعى وسىنشاسى مال شارۋاشىلىعى جانە جانۋارلار الەمى، ورمان شارۋاشىلىعى مەن اكۆامادەنيەتتى قامتيدى. بۇل جوبالاردىڭ بارلىعى ءبىر باعدارلاماعا بىرىكتىرىلگەن. سەميناردا وسى باعدارلامالاردى باسقارۋ تەتىكتەرى قاراستىرىلادى.
«اۋماقتىق دامۋدىڭ ترانسفورماتسياسى» سەمينارى بەس كۇنگە شاقتالعان. ول ناۋرىزدىڭ 11 ءى مەن 15 ءى ارالىعىندا پەتروپاۆل قالاسىندا وتەدى.
