استانادا مامىر ايىندا گاز تارتۋ جۇمىستارى باستالادى
ەلوردانى گازداندىرۋ جوباسى جالپى ءۇش كەزەڭگە جوسپارلانعان. قۇرىلىس مونتاجداۋ جۇمىستارىنىڭ جالپى سوماسى 52 ميلليارد تەڭگەنى قۇراپ وتىر. ءبىرىنشى كەزەڭگە 27 ميلليارد تەڭگە قاجەت.
الدىمەن كوگىلدىر وتىن 3 جىلۋ ەلەكتر ورتالىعىنا، سونداي-اق كوكتال-1، كوكتال-2 جانە وڭتۇستىك-شىعىس شاعىن اۋداندارىنا جەتكىزىلەتىن بولادى.
«گاز قۇبىرىن كوشەلەر بويىنا تارتامىز. 7-10 ۇيگە ورتاق ءبىر جاشىك بولادى. قالا ماماندارى كۆارتالىشىلىك جەلىلەر جاساۋدا، جاشىكتەر قويىپ، ەسەپتەۋ قۇرالدارىن ورناتىپ جاتىر. سول جەردەن كەز كەلگەن ازامات الدىن الا رۇقسات الا وتىرىپ، قوسىلا الادى. تۇرعىنداردى قوسۋدىڭ ادىستەمەسى وسىنداي بولادى»، - دەدى قالالىق وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ باسشىسى ەربول تولەۋوۆ.
اتاپ وتىلگەندەي، جوبانىڭ ەكىنشى كەزەڭىندە قالاداعى 4 تۇرعىن الابى گازداندىرىلادى. ونىڭ ىشىندە تەلمان، قالاماڭى شاعىن اۋدانى جانە Family Village بار. ءۇشىنشى - سوڭعى كەزەڭدە كوگىلدىر وتىن يلينكا كەنتىنە جانە شۋبار شاعىن اۋدانىنا تارتىلادى. سونداي-اق ورتالىقتاندىرىلعان گازعا جاڭادان سالىناتىن كوپقاباتتى ۇيلەر دە بىردەن قوسىلىپ وتىراتىن بولادى.
«قۇرىلىس جوباسىندا ەش وزگەرىس بولمايدى. جاڭا شاعىن اۋدان پايدا بولسا، وعان جەكە قازاندىق قوسا سالىنادى. گاز تارتۋ جۇيەسىن ەنگىزۋ ارقىلى جىلۋ تاراتامىز. قالانىڭ شەتىندە سالىنىپ جاتقان تۇرعىن جايلار وسىلايشا جىلىتۋ ورتالىقتارىنا قوسىلادى»، - دەدى قالالىق وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ ءبولىم باسشىسى انۋاربەك ەسەناليەۆ.
بۇگىندە استانادا 22 مىڭنان اسا جەر ءۇي بار. ولار تابيعي گازبەن 2023-جىلعا قاراي تولىعىمەن قامتىلماق.
ماماندار ءبىر جىلدا ءۇش ج ە و 430 ميلليون تەكشە مەتر گاز جاعۋى مۇمكىن ەكەنىن، ءبىراق سۇيىق وتىنمەن قوسا، باسقا دا جىلىتۋ كوزدەرى پايدالانىلاتىنىن بولجاپ وتىر. استانادا 1 تەكشە مەتر گاز قۇنى 50 مىڭ تەڭگە شاماسىندا بولاتىنى كوزدەلۋدە.
