قوستانايدا ەلدە بالاماسى جوق فۋتبول الاڭى اشىلدى
وبلىستىق دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى ازامات بەگالين ايتقانداي، اتالعان جوبا مەملەكەتتىك-جەكەمەنشىك ارىپتەستىك باعدارلاماسى شەڭبەرىندە جۇزەگە اسىرىلدى. جابىق فۋتبول مانەجى UEFA بارلىق ستاندارتتارىنا سايكەس كەلەدى جانە جاتتىعۋلار مەن جارىس وتكىزۋگە ارنالعان.
«ەلىمىزدە بالاماسى جوق الاڭ 3000 جانكۇيەرگە شاقتالعان. قۇرىلىس كولەمى 16195,0 شارشى مەتردى قۇرادى. جوبانىڭ جالپى قۇنى - 4,2 ميلليارد تەڭگە. جاڭا فۋتبول ينفراقۇرىلىمى فۋتبول ورتالىقتارى جانە بالالار مەن جاس وسپىرىمدەر سپورت مەكتەبىنىڭ جاس فۋتبولشىلارىنا جىل بويى وقۋ-جاتتىعۋ جۇمىستارىن وتكىزۋگە مۇمكىندىك بەرەدى»، - دەيدى ازامات بەگالين.
قوستاناي وبلىسىندا 971 فۋتبول ۇيىرمەسى جۇمىس ىستەسە، 373 فۋتبول مامانى ءدارىس وتكىزەدى. فۋتبول بولىمشەلەرى 20 سپورت مەكتەبىندە اشىلعان، بارلىعى 2919 جاس ويىنشى فۋتبول ويناۋ شەبەرلىگىن شىڭداۋدا.
