ماڭعىستاۋ تاريحىن زەرتتەۋگە شەتەل عالىمدارى تارتىلادى
ەلباسىنىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» باعدارلامالىق ماقالالارى اياسىندا «ماڭعىستاۋ وبلىسىنىڭ ماتەريالدىق جانە ماتەريالدىق ەمەس تاريحي-مادەني مۇرالارى» حالىقارالىق عىلىمي كەشەندى ەكسپەديتسياسىنىڭ قورىتىندىسى بويىنشا 11-13- ناۋرىزدا اقتاۋ قالاسىندا وتەتىن «ماڭعىستاۋدىڭ تاريحي-مادەني مۇرالارىن زەرتتەۋدەگى جاڭا كوزقاراستار مەن پەرسپەكتيۆالار» حالىقارالىق عىلىمي-پراكتيكالىق كونفەرەنسياسىنا وراي وتكىزىلەدى.
كونفەرەنسيا اقتاۋ قالاسى، «دوستىق ءۇيى» عيماراتىندا وتەدى دەپ جوسپارلانۋدا. كونفەرەنسيانىڭ باعدارلاماسىنا سايكەس ءتۇپقاراعان اۋدانىنا قاراستى شاقپاق-اتا جەراستى مەشىتى جانە قورىمى ەسكەرتكىشىنە كوشپەلى سەمينار ۇيىمداستىرۋ، وبلىستىق تاريحي-ولكەتانۋ مۋزەيىن جانە ماڭعىستاۋ مەملەكەتتىك تاريحي-مادەني قورىعىنىڭ ەكسپوزيتسيالارىن ارالاۋ، اقتاۋ قالاسى بويىنشا ەكسكۋرسيا وتكىزۋ، امال مەرەكەسىنە ارنالعان «ۇلى دالا كوشى» تەاترلاندىرىلعان شاراسىنا قاتىسۋى جوسپارلانعان. كونفەرەنسياعا الىس-جاقىن شەتەلدەردەن جانە ەلىمىزدىڭ عالىمدارى قاتىساتىن بولادى.
ايتا كەتەتىنى «ماڭعىستاۋ وبلىسىنىڭ ماتەريالدىق جانە ماتەريالدىق ەمەس تاريحي-مادەني مۇرالارى» حالىقارالىق عىلىمي كەشەندى ەكسپەديتسيا بارىسىندا ماڭعىستاۋ وبلىسىندا ورنالاسقان قازاقستاننىڭ جالپى ۇلتتىق ماڭىزى بار ساكرالدى ورىندارى، نوعايلى كەزەڭىنىڭ ەسكەرتكىشتەرى، ايماقتىڭ شىڭىراۋ-قۇدىقتارى، ارحەولوگيالىق ەسكەرتكىشتەرى زەرتتەلدى.
اتاپ ايتقاندا، 5 جەراستى مەشىتى، 20 قۇدىق-شىڭىراۋلار انىقتالدى. ماڭعىستاۋ ءوڭىرىنىڭ تاريحي تۇلعالارى جايىندا، سالت-ءداستۇر ەرەكشەلىكتەرى، اڭشىلىق، قۇدىقشىلىق كاسىبى، قولونەرى، زەرگەرلىك، بالۋاندىق ونەرى، ت. ب. ولكە تاريحىنا قاتىستى تىڭ مالىمەتتەر جيناقتالدى. انىقتالعان تاريحي نىساندار تۋرالى ارحيۆتىك زەرتتەۋ، لابوروتوريالىق ساراپتاۋلار جۇرگىزىلدى. رەسەي، وزبەكستان، تۇركيا، قاراشاي-شەركەسيا رەسپۋبليكالارىنا عىلىمي ءىس ساپارلار ۇيىمداستىرىلدى. زەرتتەۋ جۇمىستارىنىڭ ناتيجەسى، سۋرەتتەر، سۇحباتتار، تۇسىنىكتەمەلەر 235 بەتتىك فوتوشەجىرەگە جيناقتالدى.
سونداي-اق، كەشەندى عىلىمي ەكسپەديتسيا اياسىندا ماڭعىستاۋ اۋدانى جىڭعىلدى جانە قۇمىرا جەرىندە اپاتتان قۇتقارۋ ارحەولوگيالىق جۇمىستار جۇرگىزىلدى. زەرتتەۋلەر بارىسىندا ب. ە. 3-5 ع. ع. بەلگىلەنەتىن كاتاكومبالىق جەرلەۋلەر ارشىلىپ زەرتتەلگەن.
