ورال تەاترى جاڭا قويىلىمىن فاريزا اقىنعا ارنادى

بەلگىلى اقىن، قازاقستاننىڭ حالىق جازۋشىسى، مەملەكەتتىك سىيلىقتىڭ يەگەرى فاريزا وڭعارسىنوۆانىڭ شىعارماشىلىعىنا ارنالعان تۋىندىنىڭ جانرىن اۆتورلار نۇرلان ءسادىر مەن نۇرلىگۇل جۇباتوۆا پوەتيكالىق فەنتەزي دەپ بەلگىلەگەن ەكەن.

تۇساۋكەسەرى حالىقارالىق ايەلدەر كۇنى مەرەكەسىمەن تۇسپا-تۇس كەلگەن قويىلىمدى مادەنيەت سالاسىنىڭ ۇزدىگى نۇرلىگۇل جۇباتوۆا ساحنالاسا، سۋرەتشىسى - مۇرات مامبەتوۆ.

باستى رولدە قازاقستاننىڭ ەڭبەك سىڭىرگەن قايراتكەرى گۇلجيان شىنتەمىر وينادى (فاريزانىڭ بەينەسىن ەكىنشى قۇرامدا سونداي-اق ن. جۇباتوۆانىڭ ءوزى دە سومدايدى). سپەكتاكلگە تەاتردىڭ جاس ارتىستەرى دە بەلسەنە اتسالىستى.

قويىلىم «ولەڭ، مەن سەنى ايالاپ وتەم...» دەپ وتكەن اقىننىڭ ماحامبەت رۋحىمەن ۇندەس ءورشىل پوەزياسىن، ارمان-اڭسارىن، جاستارعا بەرەر تاعىلىمىن كورسەتۋدى ماقسات تۇتقان. سونىمەن قاتار قازىرگى قوعامنىڭ تولعاقتى ماسەلەسىنە ارنالعان انا مەن بالا پروبلەماسى دا ايتىلىپ قالادى. ەڭ باستىسى، قازاق پوەزياسىنىڭ ماڭگى الاسارماس ءبىر شىڭىنا اينالىپ ۇلگەرگەن فاريزا وڭعارسىنوۆاعا تەاتر تورىنەن تاعى ءبىر قۇرمەت كورسەتىلدى.

ح. بوكەيەۆا اتىنداعى قازاق تەاترى سوڭعى كەزدە اقىن-جازۋشىلاردىڭ، كومپوزيتورلار مەن ونەر قايراتكەرلەرىنىڭ شىعارماشىلىعىنا ارنالعان تۋىندىلاردى دا قويىپ كەلەدى.

ەسكە سالا كەتەيىك، بۇدان بۇرىن تەاتردىڭ اقىن مۇقاعالي ماقاتايەۆتىڭ «قوش، ماحاببات» اتتى شىعارماسى بويىنشا سپەكتاكل قويعانىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى