استانادا «ايەلدىڭ ماحابباتى مەن ءومىرى» اتتى مۋزىكالىق كەش وتەدى
9- ناۋرىز كۇنى ەلوردالىقتار مەن قالا قوناقتارىن تەاتردىڭ جەتەكشى ءسوليسى، تانىمال ءانشى-سوپرانو، قازاقستاننىڭ ەڭبەك سىڭىرگەن قايراتكەرى ايگۇل نيازوۆا، سونىمەن بىرگە ايتۋلى اسپاپشىلار ءوز ونەرلەرىمەن قۋانتپاق.
«مۋزىكا جانە ونىڭ شىعارۋشىلارى تۋرالى» توپتاماسىنىڭ كونسەرتىنە مۋزىكانتتار: قازاقستاننىڭ ەڭبەك سىڭىرگەن ءارتىسى ماقپال بەكماعامبەتوۆا (سكريپكا)، حالىقارالىق بايقاۋلاردىڭ لاۋرەاتتارى جىبەك ساپارعالييەۆا (فلەيتا)، اسقار مۇقانوۆ (ۆيولونچەل)، ابدىاحمەت ورازباقوۆ، راۋشان بەسكەمپىروۆا (فورتەپيانو) قاتىسادى.
تىڭدارمان نازارىنا نەمىس رومانتيك-كومپوزيتورى روبەرت شۋماننىڭ شابىتقا تولى شىعارمالارى ۇسىنىلادى. ا. شاميسسونىڭ سوزىنە جازىلعان داۋىس پەن فورتەپيانوعا ارنالعان «ايەلدىڭ ماحابباتى مەن ءومىرى» اتتى ۆوكالدىق توپتامالار شىرقالادى. اتالعان تۋىندىدا اۆتور جاس بويجەتكەننىڭ ەسەيۋى: العاشقى كەزدەسۋى، نەكەلەسۋى، ۇيلەنۋ تويى، انا باقىتىن سەزىنۋى مەن سۇيىكتىسىن جوعالتۋى تۋرالى قاراپايىم وقيعانى بايانداي وتىرىپ، ايەل تۇلعاسىنا، ونىڭ جان-جۇرەگىنىڭ سىرلى تۇپكىرلەرىنە كوڭىل بولەدى.
سەگىز اننەن تۇراتىن توپتاما 1840-جىلى كومپوزيتور قانشاما كۇش-جىگەرىن سالىپ سۇيگەن ايەلى - اتاقتى پيانينوشى كلارا ۆيكتىڭ وڭ جاۋابىنا قول جەتكىزگەن كەزدە جازىلعان بولاتىن.
وسى تۋىندى ايگۇل نيازوۆانىڭ رەپەرتۋارىندا ەرەكشە ورىنعا يە. «استانا وپەرا» جەتەكشى ءسوليسى التىنشى «جەزتاڭداي بۇلبۇل» كامەرالىق ءان سالۋ حالىقارالىق بايقاۋىندا اتاقتى ۆوكالدىق توپتامادان نومىرلەر ورىنداپ، تانىمال بايقاۋ تاريحىنا قازاقستاننان شىققان جالعىز لاۋرەات رەتىندە ەنگەن.
«ر. شۋمان تۋىندىلارىنىڭ نەگىزگى يدەياسى - باقىت. مۇندا ايەل جانىنىڭ قۇپيالىعى بەرىلىپ قانا قويماي، ونىڭ بويىنداعى ىشكى كۇش-قۋاتتىڭ كوپ ەكەنى كورسەتىلگەن. سوڭى قايعىلى بولعانىنا قاراماستان، شىعارما تاماشا اسپاپتىق پوستليۋديامەن اياقتالادى، ونىڭ اۋەنىنەن جارقىن بولاشاققا دەگەن سەنىم نوتالارى ورىن الادى. وسى تەبىرەنتەر ايانىشتى تاريح شىنايى دا اسەرلى ءۇن قاتادى. شىنايى سۇيە بىلگەن ءارى ماحابباتىنا قول جەتكىزە بىلگەن ر. شۋمان اسقاق سەزىمدى تەرەڭ ۇعىنىپ، وسىنداي كەرەمەت تۋىندىنى جازعان. وسى مۋزىكادا ۆوكالدىق جانە اسپاپتىق پارتيا ءوزارا تىعىز بايلانىسقان، ءانشى مەن پيانيست الدىندا انسامبلدىك ورىنداۋشىلىق تۇرعىسىنان ۇلكەن مىندەتتەر قويىلعان. ونىڭ ۇستىنە نەمىس تىلىندە ءان ورىنداۋدىڭ وزىندىك كۇردەلى ەرەكشەلىگى بار، وعان ايرىقشا ىرعاق، ينتوناتسيالىق دالدىك پەن فونەتيكالىق ايقىندىق قاجەت»، - دەدى ايگۇل نيازوۆا.
