قازاقتىڭ ايەلدەرى قاشاندا داستۇرگە بەرىك - الماتى اكىمى
قالا اكىمى قازىرگى كەزدە شاعىن جانە ورتا بيزنەستى ايەلدەردىڭ ۇشتەن ءبىرى باسقاراتىنىن، ءماسليحاتتىڭ جانە قوعامدىق كەڭەستىڭ بەستەن ءبىرىن ايەلدەر قۇرايتىنىن ايتتى. مەملەكەتتىك قىزمەتكەرلەردىڭ باسىم كوپشىلىگى - ايەلدەر، ءبىلىم مەن دەنساۋلىق سالاسىن ۇستاپ تۇرعاندار دا نازىك جاندىلار.
«قازاقتىڭ ايەلدەرى قاشاندا داستۇرگە بەرىك. ەڭ الدىمەن وشاقتىڭ وتىن مازداتىپ، وتباسىنىڭ بەرەكەسىن ارتتىرىپ وتىرعان دا وسى انالار. ەلباسى ايتىپ وتكەندەي، ەگەر ءاربىر وتباسىندا انا ماحابباتى سالتانات قۇراتىن بولسا، وندا بارلىق ەلىمىز كەلىسىم مەن گۇلدەنۋدىڭ ايشىقتى نۇرىنا بولەنەدى. مىنە، بۇل انا ماحابباتىنىڭ قۇدىرەتى. ءبىراق، مارگارەت تەتچەر ايتقانداي، «ءۇي ايەل الەمىنىڭ شەكاراسى ەمەس، كيەلى ورداسى بولۋى ءتيىس». زاماناۋي ايەلدەر وسىنىڭ ايقىن دالەلى. بۇگىنگى الماتى - ايەلدەر ءبىلىم الاتىن، رۋحاني قۇندىلىقتاردى قالىپتاستىراتىن، وتباسىن قۇرىپ، بالا تاربيەلەيتىن، باقىتقا كەنەلىپ، دارا تۇلعاعا اينالاتىن قالا. ءبىز وسىناۋ قۇندىلىقتاردى ساقتاۋعا جانە دامىتۋعا قاشاندا ۇمتىلاتىن بولامىز»، - دەدى باۋىرجان بايبەك.
ايتا كەتەرلىگى، مەملەكەت باسشىسىنىڭ از قامتىلعان جانە كوپبالالى وتباسىلارعا قولداۋ كورسەتۋ جونىندەگى تاپسىرماسىن جۇزەگە اسىرۋ اياسىندا الماتىدا 7 باعىت بويىنشا ناقتىلى 13 شارا ەنگەن «باقىتتى وتباسى» قالالىق باعدارلاماسى جاسالدى. ولاردىڭ ىشىندە جەڭىلدەتىلگەن تۇرعىن ءۇي يپوتەكاسى، قايتا وقىتۋ جانە جۇمىسپەن قامتۋ، ستيپەنديا جانە تەگىن بالا باقشا، جەرگىلىكتى بيۋدجەتتەن ءبىر رەتتىك تولەم كولەمىن ارتتىرۋ ماسەلەلەرى بار.
