مالايزيالىق ديپلومدى ەندى تۇركىستاندا الۋعا بولادى
بۇل كەلىسىم كۋالا- لۋمپۋردا وتكەن حالىقارالىق بيزنەس- فورۋم اياسىندا تۇركىستان دەلەگاتسياسى مەن Taylor's University باسشىلىعى اراسىندا جاسالدى، دەپ حابارلايدى قازاقپارات ءتىلشىسى.
«تۇركىستان» ا ك ك» ا ق فيليالى «Turkistan Invest» كومپانياسى باسپا ءسوز قىزمەتىنىڭ مالىمەتىنشە، فورۋم تۇركىستاندىق دەلەگاتتاردىڭ مالايزياعا جاساعان روۋد- شوۋى بارىسىندا ءوتتى. مالايزيا ۋنيۆەرسيتەتىنىڭ باعدارلاماسى تۇركىستان وبلىسىندا قۇرىلىسى بيىل باستالعالى جاتقان حالىقارالىق تۋريزم جانە سەرۆيستىك قىزمەت كوللەدجى ستۋدەنتتەرىنىڭ وقۋ باعدارلاماسىنا ەنگىزىلەدى. وندا حالىقارالىق دەڭگەيدەگى ءبىلىمدى تۋريزم جانە سەرۆيستىك قىزمەت سالاسىنداعى بولاشاق ماماندار الادى.
«دۋالدى وقىتۋ جۇيەسىندە بىردەن ەكى ديپلوم الۋعا بولادى. ياعني، حالىقارالىق كوللەدج تۇلەكتەرى وقۋدى ءتامامداعاندا اتالمىش كوللەدجدىڭ ديپلومىن جانە Taylor's ۋنيۆەرسيتەتىنىڭ ديپلومىن يەلەنەدى. بۇل تەك قازاقستاندا عانا ەمەس، شەتەلدە دە جۇمىس تابۋعا ەرەكشە مۇمكىندىك بەرەدى» ، - دەدى تۇركىستان وبلىسىنىڭ تۋريزم جانە سىرتقى بايلانىستار باسقارماسى باستىعىنىڭ ورىنباسارى جاسۇلان تۇلەبەكوۆ.
قازىرگى ۋاقىتتا تاراپتار ارىپتەستىكتىڭ ەگجەي- تەگجەيىن تالقىلاپ جاتىر.
«كەلىسسوز بارىسىندا مالايزيالىق بيزنەس وكىلدەرى تۋريزم سالاسىنا ينۆەستيتسيا سالۋعا قىزىعۋشىلىق تانىتتى. اتاپ ايتقاندا، تۇركىستاندا قوناقۇيلەر مەن حوستەلدەر سالۋ مۇمكىندىگى تالقىلاندى. مالايزيانىڭ الەمدە تۋريزم بويىنشا كوشباسشى ەلدەر قاتارىندا ەكەنى بەلگىلى، سوندىقتان، ءبىز ءوز تاراپىمىزدان ەكىجاقتى ءتيىمدى ىنتىماقتاستىق قۇرۋ ماقساتىندا بارىنشا قولداۋ كورسەتىپ، جاعداي جاسايمىز» ، - دەدى «تۇركىستان» ا ك ك» ا ق فيليالى «Turkistan Invest» سىرتقى بايلانىستار جونىندەگى باسقارۋشى ديرەكتورى بايان كايۋپوۆا.
ايتا كەتەيىك، حالىقارالىق بيزنەس- فورۋمعا 100 دەن استام ءىرى مالازيالىق تۋروپەراتورلار مەن كاسىپكەرلەر قاتىستى. تۇركىستاندىق دەلەگاتسيانىڭ وكىلدەرى ءىس- شارا قاتىسۋشىلارىنا تۇركىستان وبلىسىنىڭ تۋريستىك مۇمكىندىكتەرىن تانىستىردى. وندا ءوڭىردىڭ تاريحي- مادەني مۇرالارى مەن نىساندارى، ەمدەۋ- ساۋىقتىرۋ ورىندارى، قىسقا مەرزىمدى تۋرلار، جاڭا قىزىقتى مارشرۋتتار، قوناقۇيلەر، دەمالىس ايماقتارى، ينفراقۇرىلىم مەن سەرۆيستىك قىزمەتتىڭ دامۋى، جۇزەگە اسىپ جاتقان ينۆەستيتسيالىق جوبالار كورسەتىلدى. تانىستىرىلىمداردان كەيىن ەكىجاقتى В2В فورماتىندا كەزدەسۋلەر ءوتتى.
